Kosova e pafat në Lojërat Olimpike Dimërore për të rinj

Skitori kosovar, Klos Vokshi ka marrë pjesë sot në Lojërat Olimpike Dimërore për të rinj Gangwon 2024, por që gara nuk shkoi në favor të tij.

Këtë e ka bërë të ditur Komuniteti Olimpik i Kosovës (KOK).

“Vokshi garoi në disiplinën e sllallomit të madh, në të cilën ishte i pafat, pasi në lëshimin e dytë doli nga shtegu. Në lëshimin e parë zuri vendin e 54-të prej 79 garuesve. Krahas tij, garën nuk e përfunduan edhe 29 skitarë tjerë”, thuhet në njoftimin e KOK në Facebook.

Ndërsa në disiplinën e njëjtë, por tek vajzat ka marrë pjesë Lirika Deva e cila ka arritur të renditet në vendin e 31-të, shkruan rtv21.tv.

Vokshi e Deva janë skitarët e vetëm që po e përfaqësojnë Kosovën në LOD për të rinj, që po mbahen në Gangwon të Koresë së Jugut./21Media