“Kosova të respektojë parimet ekzistuese të garantimit të lirisë së shprehjes”

Kështu kanë deklaruar nga Zyra e BE-së në Kosovë në lidhje me ndryshimin e Kodit Penal të Kosovës

Zyra e BE-së në Kosovë/Përfaqësuesi Special i BE-së përmes një komunikate për media të enjten ka shprehur brengosje në lidhje me synimin e autoriteteve të Kosovës për të ndryshuar e plotësuar Kodin Penal të Kosovës me dispozita të reja për shpifjen dhe fyerjen, pasi kjo, siç thuhet, është në kundërshtim me trendet ndërkombëtare të shfuqizimit të ligjeve penale të shpifjes.

“Një numër shtetesh anëtare apo anëtare potenciale të BE-së, duke përfshirë Kosovën, tashmë kanë hequr kriminalizimin e shpifjes dhe fyerjes, ndërsa vendet tjera kanë bërë hapa të rëndësishëm në të njëjtin drejtim. Dekriminalizimi i shpifjes dhe fyerjes në Kosovë është raportuar si përparim në Raportin e Komisionit Evropian më 2013. Legjislacioni civil në Kosovë ofron masa të mjaftueshme në lidhje me shpifjet dhe fyerjet”, thuhet në reagim.

Kurse në fund tuhet se BE-ja  i bën thirrje autoriteteve të Kosovës që të vazhdojnë respektimin e parimeve ekzistuese të garantimit të lirisë së shprehjes, të përligjur në Kushtetutën e Kosovës, e cila është përafruar me standardet më të larta evropiane.