Kryediplomati britanik: Duam normalizim Kosovë-Serbi
(Lajm i përditësuar)
Sekretari i Shtetit për Punë të Jashtme të Mbretërisë së Bashkuar, David Lammy, ka kërkuar paqe dhe normalizim të qëndrueshëm të raporteve mes Kosovës dhe Serbisë.
Kryediplomati britanik pas takimit me presidenten e Kosovës, Vjosa Osmani, tha se përkrah aspiratat euro-atlantike të Kosovës.
Ai gjatë deklarimit për media tha se mbështesin trupat e KFOR-it në Kosovë, derisa shtoi se i njëjti është kyç për sigurinë e Kosovës
Osmani: Serbia t’i vendosë para përgjegjësisë autorët e sulmit terrorist në veri
Presidentja e Kosovës, Vjosa Osmani, ka thënë se Kosova është palë konstruktive në dialog, pavarësisht se po përballet me obstruksione nga ana e Serbisë, raporton KosovaPress.
E para e vendit, pas takimit me sekretarin britanik për Punë të Jashtme, David Lammy, tha se është e domosdoshme që Serbia t’i vendosë para përgjegjësisë autorët e sulmit terrorist në veri në vitin 2023.
Krahas kësaj, Osmani tha se ka propozuar lidhjen e marrëveshjes për thellimin strategjik të Kosovës dhe Mbretërisë së Bashkuar që do të mbulojë fushën e mbrojtjes dhe të ekonomisë.
Osmani pret në takim sekretarin e Jashtëm britanik
Ka nisur takimi i presidents Vjosa Osmani me Sekretarin e Jashtëm të Mbretërisë së Bashkuar, David Lammy.
Takimi po zhvillohet në Presidencë.
Lammy ka mbërritur mbrëmë në Kosovë. Ai në Aeroportin Ndërkombëtar të Prishtinës, “Adem Jashari”, u pritë Ministrja në detyrë e Punëve të Jashtme dhe Diasporës, Donika Gërvalla./21Media