Kryetarja e PE-së e quan moment krenarie nënshkrimin e vendimit për heqjen e vizave për Kosovën
(Lajm i përditësuar)
Kryetarja e PE-së e quan moment krenarie nënshkrimin e vendimit për heqjen e vizave për Kosovën
Kryetarja e Parlamentit Evropian Roberta Metsola e ka quajtur moment krenarie nënshkrimin e vendimit për liberalizmin e vizave për Kosovën.
Ajo përmes një postimi në Twitter uroi kosovarët duke thënë se kjo do ta lehtësojë jetën për popullin e Kosovës.
“Nënshkruar, vulosur, dorëzuar. Moment krenarie për Parlamentin Evropian, pasi sot dhamë dritën jeshile përfundimtare për liberalizimin e vizave me Kosovën. Kjo do ta bëjë jetën më të lehtë për popullin e Kosovës – të udhëtojë, të bëjë biznes, të thellojë lidhjen me evropianët”, shkroi Metsola.
Signed, sealed, delivered.
Proud moment for @Europarl_EN as today we gave our final green light for visa liberalisation with Kosovo.
This will make life easier for the people of Kosovo – to travel, to do business, to deepen the bond with fellow Europeans. pic.twitter.com/cZVx5eZ8QU
— Roberta Metsola (@EP_President) April 19, 2023
15: 20- Nënshkruhet vendimi për liberalizimin e vizave
Bashkimi Evropian nënshkroi sot aktin ligjor, me të cilin Kosova hyn në listën e shteteve, të cilave nuk iu nevojitet viza hyrëse për në Bashkimin Evropian.
Pas ceremonisë së nënshkrimit, eurodeputeti evropian, njëherësh raportuesi për Kosovën në cështjen e vizave, Thijs Reuten u shpreh se me këtë vendim padrejtësisë ndaj Kosovës i vjen fundi.
“Kosova ka punuar shumë për t’i plotësuar gjitha kushtet për liberalizim të vizave para shumë vitesh”, tha ai.
Ndërkaq, zëvendëskryeminsitri Besnik Bislimi tha se liberalizimi i vizave për Kosovën do ta afrojë Kosovën më afër Bashkimit Evropian.
Ndryshe, dje Parlamenti Evropian ka miratuar vendimin për liberalizimin e vizave për Kosovën. Presidentja e vendit Vjosa Osmani e ka quajtur hap të rëndësishëm për demokracinë në Kosovë, por edhe Evropën.
08: 16- Sot nënshkruhet zyrtarisht vendimi për liberalizimin e vizave
Sot në Strasburg do të nënshkruhet zyrtarisht vendimi për liberalizimin e vizave për Kosovën.
Për këtë arsye për në Strasburg udhëton zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi.
“ Ai do të marrë pjesë në ceremoninë e nënshkrimit zyrtar të vendimit për liberalizimin e vizave për Kosovën në Parlamentin Evropian, e organizuar nga Presidentja e Parlamentit Roberta Metsola”, thuhet në njoftim.
Ceremonia do të fillojë në orën 14:45.
Pas ceremonisë së nënshkrimit, zëvendëskryeministri Bislimi do të mbajë një konferencë për media në Parlamentin Evropian së bashku me eurodeputetin dhe Raportuesin për Kosovën për çështjen e vizave Thijs Reuten, me fillim nga ora 15:15.
Ndryshe, dje Parlamenti Evropian ka miratuar vendimin për liberalizimin e vizave për Kosovën. Presidentja e vendit Vjosa Osmani e ka quajtur hap të rëndësishëm për demokracinë në Kosovë, por edhe vet Evropën.