Kurti dhe Scholz biseduan për çështje aktuale

Kryeministri i Kosovës, Albin Kurti, mori pjesë në Kongresin e 30-të jubilar të Partisë së Socialistëve Evropianë, PES Congress 2022.
Gjatë qëndrimit njëditor në Berlin, Kurti mori pjesë në asamblenë e kongresit, takoi liderë dhe politikanë të tjerë socialdemokratë, si dhe mori pjesë në darkën e përbashkët.
Me kancelarin e Republikës Federale të Gjermanisë, Olaf Scholz, Kurti bisedoi për marrëdhëniet bilaterale ndërmjet Kosovës dhe Gjermanisë, si dhe për çështjet aktuale.
Kryeministri i uroi Stefan Lofven për pozitën e re si president i Partisë së Socialistëve Evropianë, kurse e falënderoi Sergei Stanischew për kontributin e tij si president i deritanishëm i PSE-së.
Në takimin me Lars Klingbeil, bashkëdrejtues i Partisë Social Demokrate gjermane, u bisedua për vëmendjen e shtuar të Gjermanisë për rajonin e Ballkanit Perëndimor, si dhe për rëndësinë e bashkëpunimit rajonal në kuadër të procesit të Berlinit.
Në përmbyllje, kryeministri mori pjesë në darkën e liderëve, ku me një fjalë rasti iu drejtua krerëve shtetërorë, komisionerëve evropianë, udhëheqësve të partive dhe përfaqësuesve të tjerë pjesëmarrës.
Në këtë kongres të partive socialdemokrate, u diskutua për politikat si përgjigje ndaj ndryshimeve në sigurinë ndërkombëtare, rritjen e çmimeve të energjisë dhe inflacionin, krizën e shkaktuar nga COVID, ndryshimet klimatike dhe sfidat sociale në Evropë./21Media