Kurti: NATO-n e duam në Kosovë dhe Kosovën në NATO
(Lajm i përditësuar)
Kryeministri i Kosovës, Albin Kurti ka deklaruar se Qeveria e Kosovës i ka shpallur organizatat “Mbrojtja Civile”, dhe “Brigata e Veriut”, si organizata terroriste dhe strukturat ilegale po mbyllen, shërbimet e tyre po zëvendësohen me shërbime të mira e të drejta të institucioneve të Kosovës.
Kurti në mbledhjen e këshillit të përgjithshëm të Lëvizjes Vetëvendosje, ka thënë se konfirmojnë angazhimin për drejtësi e cila është për paqe të qëndrueshme dhe pajtim në mes popujve.
“I bëjmë thirrje organeve tona të drejtësisë, prokurorisë e gjyqësorit që të jenë shumë më aktiv e të bëjnë krejt çfarë munden e dinë, në mënyrë që plagët e hapura nga krimet e kryera gjatë luftës ndaj popullit tonë të mbyllen me drejtësi për viktimat dhe për ndeshkushmëri për kriminelët. Por është interesant që në 11 korrik, bëhet 11 vjet prej kur me procedura të përshpejtuara, deputetët nga të gjitha partitë që janë në opozitë sot me të dy të tretat e votave imiratuan projektligjin për amnisti që i fali krimet e strukturave kriminale të Serbisë në Kosovë. Qeveritarët e asaj kohe e përshkruanin ligjin si një akt të rëndësishëm e të nevojshëm politik… Qeveria jonë i ka shpallur organizatat e tyre “Mbrojtja Civile”, dhe “Brigata e Veriut”, organizata terroriste, strukturat ilegale po mbyllen, shërbimet e tyre po zëvendësohen me shërbime të mira e të drejta të institucioneve të Kosovës. Nuk ka amnisti sepse ajo do të ishte padrejtësi ndaj viktimave, qytetarëve dhe shtetit tonë pa dallim, ka respektim të rendit dhe të ligjit, demokracisë dhe të drejtave të njeriut”, tha ai.
Kryeministri Albin Kurti tha se fuqizimi i subjektivitetit të Kosovës është cak i programit qeveritar dhe punës së përditshme të tyre.
“Në Këshillin e Evropës kemi kaluar me sukses fazën e ambasadorëve të Këshillit të Evropës, komitetit për çështje politike dhe Asamblesë parlamentare, të cilat që të gjitha i kanë thënë po të zëshme e të fuqishme, bindës anëtarësimit të Kosovës në organizatën më të vjetër të kontinentit tonë. Vazhdojmë të besojmë që anëtarësimi jonë në Këshillin e Evropës është vlerë e shtuar për organizatën dhe mekanizëm i duhur për qytetarët tanë. Ndërkaq, në asamblenë parlamentare të NATOS-s, vendi ynë me shumicë dërmuese të votave të delegatëve të shteteve anëtare të NATO-s, mori statusin e anëtarit të asociuar. NATO-n e duam në Kosovë dhe Kosovën e duam në NATO”, tha ai.
Kurti: Vrima prej të cilës rridhte pa paraja e buxhetit tonë, po mbyllet njëherë e përgjithmonë
Kryeministri Albin Kurti, është shprehur se vrima nga e cila rridhte buxheti i qeverisjes, tani po mbyllet përgjithmonë.
Kështu u shpreh kreu i VV-së në mbledhjen e 55-të të këshillit të përgjithshëm të saj.
Po ashtu, ndër të tjera Kurti përmendi të arriturat në fushën e energjisë elektrike, në katërvjetorin e udhëheqjes së tij në krye të qeverisë.
“Në këtë gjashtëmujor të parë filloi edhe regjistrimi i energjisë elektrike në katër komunat në veri të Kosovës, dhe inkasimi për konsum të energjisë. Në fushën e energjisë patëm hapa të rëndësishëm, sa janë edhe historike. Më në fund, e pas një kohe shumë të gjatë, me dekada e jo me vite e muaj, vrima prej të cilës rridhte pa ndërprerë e pa masë paraja e buxhetit tonë, po mbyllet njëherë e përgjithmonë”, tha Kurti.
Kurti tregon arsyet pse nuk duhet lëshuar Kosovën
Kryeministri i Kosovës, Albin Kurti ka thënë se ekzistojnë disa arsye që qytetarët e Kosovës të mos largohen nga Kosova por edhe për të kthehen në atdhe.
Në një fjalim në mbledhjen e 55-të të Këshillit të Përgjithshëm të Lëvizjes Vetëvendosje të dielën, Kurti ka thënë se Kosova ka qeverisje të mirë.
“Tash kemi rritje ekonomike dhe stabilitet institucional, progres shoqëror me qeverisje të mirë, sundim të ligjit e shtrirje të sovranitetit, lëvizje të lirë e pa viza për shumë vende. Këto janë arsye jo vetëm për të qëndruar në Kosovë, por edhe për tu kthyer në atdhe”, tha Kurti.
Ai ka folur edhe për regjistrimin e mërgatës dhe u ka bërë thirrje atyre që të vazhdojnë ta bëjnë këtë.
“Regjistrimi online i mërgatës po vazhdon. Ai është i hapur deri në fund të muajit gusht e edhe nga këtu sot u bëj thirrje të gjithë bashkatdhetarëve tonë të dashur që patjetër të regjistrohen ata të cilët tashmë nuk e kanë bërë këtë gjë dhe jo vetëm kaq”, tha kryeministri.
Dëshiron ta dëgjosh këtë lajm me zë?