Kurti përsërit shqetësimin mbi sundimin e ligjit në Serbi
Kryeministri i Kosovës, Albin Kurti, ka shprehur shqetësimin mbi sundimin e ligjit në Serbi.
Ai në një postim në rrjetin social X, ka bashkëngjitur reagimin e kryetarit të Partisë së Socialistëve Evropianë (PES) Stefan Lofven, duke thënë se zgjedhjet e lira dhe të ndershme janë gurthemel i stabilitetit dhe progresit.
“I përsëris shqetësimet e ngritura nga presidenti i PES Stefan Lofven në lidhje me sundimin e ligjit në Serbi. Zgjedhjet e lira dhe të ndershme, si gurthemel i stabilitetit dhe progresit, duhet të mbrohen kolektivisht. Këto shtylla të demokracisë janë vendimtare për aspiratat tona të përbashkëta si socialdemokratë”, shkruan Kurti.
Në letrën që Lofven i ka dërguar kryeministres së Serbisë, Ana Brnabiq më 9 janar 2024, shprehet shqetësimi mbi parregullsitë e konstatuara nga vëzhguesit ndërkombëtarë për zgjedhjet e 17 dhjetorit 2023 në Serbi.
“Si një parti politike evropiane që ndan dhe mbron vlerat themelore të Bashkimit Evropian si demokracia, sundimi i ligjit, të drejtat civile dhe mundësitë e barabarta për të gjitha partitë politike legjitime për të marrë pjesë në zgjedhje, ne duhet të reagojmë për parregullsitë e konstatuara nga Misioni Vëzhgues Ndërkombëtar i Zgjedhjeve (IOEM) gjatë zgjedhjeve në Serbi”, thuhet në letër.
