Kurti takohet me Borrellin në Paris
Takime për "zbutjen e përshkallëzimit të situatës"
Kryeministri i Kosovës, Albin Kurti, është takuar me Përfaqësuesin e Lartë të Bashkimit Evropian, Josep Borrell, në Paris. Qendra televizive e informacionit e BE-së, Europe By Satellite, ka publikuar pamje nga ky takim të premten në mëngjes.
Ky takim ishte paralajmëruar të enjten nga zëdhënësi i BE-së, Peter Stano, përmes një postimi në Twitter. Ai bëri të ditur se Borrelli do të ketë takim gjatë të premtes edhe me presidentin e Serbisë, Aleksandar Vuçiqin.
Stano tha se këto takime janë “tentime për të ndihmuar në zbutjen e përshkallëzimit të situatës, qetësimin e tensioneve aktuale dhe avancimin e dialogut të Brukselit”.
Kurti dhe Vuçiqi ndodhen në Paris për të marrë pjesë në Forumin e Paqes. Aty po janë edhe presidentja e Kosovës, Vjosa Osmani, dhe kryeministrja e Serbisë, Ana Bërnabiq.
Presidenti i Serbisë, Aleksandar Vuçiq, ka thënë më 10 nëntor se nuk beson se do të takohet me kryeministrin e Kosovës, Albin Kurti, në Paris.
Gjatë të enjtes, Kurti dhe Osmani u takuan me kryeministrin francez, Emmanuel Macron. Në komunikatën e përbashkët të lëshuar nga Presidenca dhe Qeveria e Kosovës u tha se ishte diskutuar edhe për planin franko-gjerman.