Kurti thirrje komuniteteve: Bëhuni pjesë e Policisë së Kosovës, ta ruajmë sigurinë në veri
Kryeministri i Kosovës, Albin Kurti, ka thënë se siguria është një nga shtyllat bazë të qeverisjes së tyre.
“Policia e Kosovës, si një institucion që është gjithmonë me të gjithë ne, që nga themelimi i saj ka hapur dyert për dhjetëra gjenerata, djem e vajza, pa dallime në bazë etnike apo fetare. Të gjithë ata shërbejnë sot, me uniformë policie, me besnikëri dhe nder, kudo brenda Republikës”, ka thënë Kurti.
Kurti ka ftuar pjesëtarët e komuniteteve pakicë në Kosovës që të aplikojnë për t’u bërë pjesë e Policisë së Kosovës në konkursin që mbetet i hapur deri më 26 janar.
Ai ka thënë se Policia e Kosovës është në shërbim të të gjithëve.
“Tani, kur jemi para fazës finale të diplomimit të një gjenerate të përbërë nga djem dhe vajza të të gjitha komuniteteve, dhe të cilët janë të gatshëm të fillojnë të ofrojnë shërbime për të gjithë qytetarët në vendin tonë, Policia e Kosovës ka hapur derën për qytetarët e të gjitha komuniteteve që jetojnë në Kosovë për t’iu bashkuar me qëllim që të ofrojnë shërbimet e tyre për qytetarët tanë që jetojnë në komunat në veri të vendit. Konkursi është i hapur deri më 26 janar. Me këtë rast ftoj të gjithë qytetarët e të gjitha komuniteteve që jetojnë në Kosovë – serbë, boshnjakë, turq, goranë, romë, ashkali, egjiptianë, kroatë dhe malazezë – që ta shfrytëzojnë këtë mundësi, të aplikojnë dhe të angazhohen për sigurinë e të gjithë qytetarëve brenda komunave në veri të Republikës së Kosovës. Policia e Kosovës është për të gjithë ne, me të gjithë ne dhe në shërbim të të gjithëve. Nuk ka dhe nuk do të ketë dallime brenda saj apo në ofrimin e shërbimeve për qytetarët tanë”, ka thënë Kurti në një video-adresim në gjuhën serbe./21Media