Kusari-Lila për letrën e liderëve të shtetit për Asociacionin: S’është asgjë më shumë se një formalitet

Sot u raportua se liderët e shtetit, Vjosa Osmani, Glauk Konjufcadhe Albin Kurti i kanë dërguar një letër raportueses për Kosovën në Këshillin e Evropës, Dora Bakojanis, ku janë zotuar se do t’i zbatojnë të gjitha masat që i kërkohen Kosovës pasi të bëhet pjesë e Këshillit të Evropës, përfshirë edhe themelimin e Asociacionit të Komunave me Shumicë Serbe.

Lidhur me këtë në një konferencë për media, shefja e grupit parlamentar të VV-së, Mimoza Kusari – Lila tha se kjo nuk është diçka e pazakontë, dhe sipas saj, është letër standarde pa të cilin nuk mund të votohet raporti për anëtarësim.

“Nëse kjo letër është bërë publike, nuk është asgjë e pazakontë, letër e përbashkët e tre krerëve. Letër standarde pa të cilën nuk do të votohej raporti për anëtarësim më datë 27 mars. Procedura standard është që letra e shtetit aspirues për anëtarësim duhet të përkushtohet për t’ju përmbajtur raportit që propozon anëtarësimin. Letra nuk është asgjë më shumë se formalitet që i duhet përmbajtur, kurse pjesëve që iu referohet letra, janë referencë te opinioni i Raportueses”, u shpreh ajo.

Tutje, Kusari-Lila deklaroi se “opinioni përmend marrëveshjen bazike, pra jo në mënyrë të veçantë nenin 7, por tërësisë së obligimeve si njohja de facto, anëtësimi në organizata ndërkombëtare”.