Lavrov: Rusia nuk do të negociojë sipas planit të paqes të Zelenskit

Moska nuk do të negociojë me Kievin në bazë të formulës së propozuar të paqes nga Presidenti, Volodymyr Zelensky, tha ministri i Jashtëm rus, Sergey Lavrov, sipas mediave shtetërore të enjten.
Lavrov i tha agjencisë shtetërore RIA Novosti se ideja e Zelenskit për të dëbuar trupat ruse nga Donbasi, Krimea, Zaporizhzhia dhe Kherson me ndihmën e Perëndimit ishte “një iluzion”.
Ai hodhi poshtë gjithashtu idenë se Kievi do të arrinte reparacione ose se Rusia do të paraqitej në gjykatat ndërkombëtare.
“Ne nuk do të flasim me askënd në kushte të tilla”, tha Lavrov.
Megjithatë, Lavrov theksoi se Rusia mbetet e hapur ndaj zgjidhjeve diplomatike për t’i dhënë fund luftës.
Zelensky prezantoi formulën e paqes prej 10 pikash të Ukrainës para udhëheqësve botërorë në samitin e Grupit 20 në Bali, Indonezi, në nëntor.
Hapat përfshijnë një rrugë drejt sigurisë bërthamore, sigurinë ushqimore, një gjykatë speciale për krimet e dyshuara të luftës ruse dhe një traktat përfundimtar paqeje me Moskën. Ai u kërkoi gjithashtu udhëheqësve të G20-ës që të përdorin të gjithë fuqinë e tyre për ta “bërë Rusinë të braktisë kërcënimet bërthamore” dhe të zbatojë një kufi çmimi për energjinë e importuar nga Moska.
Gjatë fjalimit të tij në Kongresin e SHBA javën e kaluar, Zelensky pretendoi se presidenti amerikan Joe Biden e kishte miratuar planin./21Media