LDK: Kërkojmë nga Qeveria plan të qartë për zgjidhjen e situatës në veri

Lidhja Demokratike e Kosovës ka shprehur shqetësimin e thellë për gjendjen e sigurisë në veri të vendit.
LDK ka thënë se sulmet ndaj Policisë së Kosovës dhe ndaj EULEX-it cënojnë rendin kushtetues të Republikës së Kosovës.
“Sulmet ndaj institucioneve të Republikës, pjesëtarëve të Policisë së Kosovës dhe të EULEX-it, si dhe barrikadimi dhe mbyllja e rrugëve janë veprime që cënojnë rendin kushtetues të Republikës prandaj si të tilla ato janë të papranueshme. LDK-ja i dënon ashpër këto veprime dhe kërkon që autorët e sulmeve të sillen para institucioneve të drejtësisë së Republikës së Kosovës”, thuhet në reagimin e LDK-së.
LDK ka përsëritur kërkesën ndaj Qeverisë për koordinim me partnerët e vendit.
“LDK-ja edhe një herë përsërit kërkesën e saj ndaj Qeverisë dhe institucioneve të tjera të vendit për koordinim të veprimeve me partnerët e Kosovës, si rrugë e vetme drejt kthimit të rendit, sigurisë dhe lëvizjes së lirë në gjithë territorin e Kosovës. Çdo rrugë tjetër është rënie në kurthin e synimeve destabilizuese të Serbisë. LDK kërkon nga Qeveria e Kosovës plan të qartë për të zgjidhur situatën e sigurisë në veri. Në këto momente vendit i duhet lidership i vërtetë që do të veprojë me mençuri dhe vendosmëri; që në vend ndarjes e përçarjes siguron unitet të brendshëm e koordinim të ngushtë me aleatët tanë”, bëhet e ditur në reagimin e LDK-së./21Media