Lëndohen rëndë dy persona në vendet e tyre të punës

Dy persona në raste të ndara janë lënduar rëndë në vendet e tyre të punës dje në Prizren.

Sipas Policisë, njëri rast ka ndodhur në fshatin Krushë e Vogël rreth orës 10:00. Viktima bëhet e ditur se ka pranuar tretman mjekësor në Spitalin e Prizrenit.

“Fshati Krushë e Vogël, Prizren 26.07.2023 – 10:00. Viktima mashkull kosovar ka pranuar tretman mjekësor në spitalin e Prizrenit, pasi që i njëjti derisa ka qenë duke punuar ka pësuar lëndime të rënda trupore”, thuhet në raportin 24 orësh.

Është njoftuar prokurori, ndërsa rasti i iniciuar si “Lëndim i rëndë trupor” është në procedurë hetimore.

Në raportin e Policisë bëhet e ditur se rasti tjetër ka ndodhur rreth orës 15:50, kur një person është dërguar në Qendrën Klinike Universitare të Kosovës për tretman mjekësor, pasi që derisa ka qenë duke punuar në një kompaninë ndërtimi, është rrëzuar dhe ka pësuar lëndime të rënda trupore.

“Prizren 26.07.2023 – 15:50. Viktima mashkull kosovar është dërguar në QKUK për tretman mjekësor, pasi që derisa ka qenë duke punuar në kompaninë ndërtimi, është rrëzuar dhe ka pësuar lëndime të rënda trupore”, thuhet tutje në raport./21Media