Lëshohet vendimi për ndalim për Nuredin Lushtakun

Ish-nënkryetarit të Komunës së Skënderajt, Nuredin Lushtakut iu është bërë ftesë për ndalim, por që nuk është hasur ende nga organet e rendit.
Pas grumbullimit të provave, prokurori kujdestar i Prokurorisë Themelore në Mitrovicë ka lëshuar vendimin për ndalim për të dyshuarin Nuredin Lushtaku, por i njëjti ende nuk është hasur nga policia dhe është në kërkim. Sipas Prokurorisë posa të arrestohet, ndaj të njëjtit do të paraqitet kërkesa për caktimin e masës së paraburgimit.
Prokuroria Themelore në Mitrovicë – Departamenti i Krimeve të Rënda, ka kërkuar nga Gjykata Themelore në Mitrovicë caktimin e paraburgimit për të dyshuarit F.L., dhe A.L., për shkak të dyshimit të bazuar se kanë kryer veprat penale “Sulmi ndaj personit zyrtar”, “Përdorimi i armës apo mjetit të rrezikshëm”, si dhe “Mbajtja në pronësi, kontroll ose posedim të paautorizuar të armëve”.
Ekziston dyshimi i bazuar se të dyshuarit F.L., A.L., dhe N.L., me datë 02 korrik 2022 rreth orës 23:45 në Skënderaj, kanë sulmuar dy zyrtarë policorë të Stacionit Policor në Skënderaj me iniciale E.B., dhe M.G., që kanë qenë në detyrë zyrtare, dhe gjatë sulmit ka rezultuar me lëndime të zyrtarëve policorë, dhe njëri zyrtar policor është goditur me predhë të armës në këmbë./21Media