Maqedonci: Avancimi i Kosovës në Asamblenë Parlamentare të NATO-s, hap i madh për sigurinë
(Lajm i përditësuar)
Ministri i Mbrojtjes, Ejup Maqedonci, e ka mirëpritur vendimin e Asamblesë Parlamentare të NATO-s për avancimin e statusit të Kosovës.
Maqedonci përmes një postimi në platformën X ka thënë se avancimi i Kuvendit të Kosovës nga vëzhgues parlamentar në anëtar të asociuar është një hap i madh për sigurinë.
“Komiteti i Përhershëm i Asamblesë Parlamentare të NATO-s vendosi sot ta avancojë Kuvendin e Kosovës nga vëzhgues parlamentar në anëtar të asociuar. Ky është një hap i madh përpara për sigurinë dhe prosperitetin e Kosovës dhe rajonit”, ka shkruar ai.
Ai ka shtuar se anëtarësimi në NATO dhe BE është thelbësor për çdo vend demokratik.
The Standing Committee of NATO PA decided today to upgrade the Assembly of 🇽🇰 from parliamentary observer to associate member. This is a big step forward for the security & prosperity of 🇽🇰 and the region.
Membership in both @NATO & #EU is essential for every democratic country. pic.twitter.com/mh5N5KqdF5
— Ejup Maqedonci (@EjupMaqedonci) March 24, 2024
Kosovës i avancohet statusi në Asamblenë Parlamentare të NATO-s
Deputeti i Lëvizjes Vetëvendosje, Driton Hyseni, ka thënë se Kosovës i është avancuar statusi në Asamblenë Parlamentare të NATO-s.
Hyseni, i cili është kryesues i Delegacionit të Kuvendit të Kosovës në Asamblenë Parlamentare të NATO-s, ka bërë të ditur se gjatë punimeve të së dielës të Komisionit të Përhershëm drejtues të kësaj asambleje që po mbahet në Estoni, Kosovës i është ngritur statusi në nivelin e anëtarit të asociuar.
“Ky është niveli më i lartë i prezencës në Asamble deri në anëtarësim të plotë të Kosovës në NATO. Për shumë vite Kosova kishte statusin e anëtarit vëzhgues. Ky vendim do të formalizohet me votim në Asamblenë parlamentare të NATO-s në sesionin pranveror të Asamblesë, që do të mbahet më 27 maj në Sofje”, ka shkruar ai në Facebook.
Sipas Hysenit, me ngritjen e nivelit të përfaqësimit në Asamblenë e NATO-s, Kosova do të ketë zgjerim të delegacionit, përfshirje më të madhe në vendimet e Asamblesë dhe të drejtë në adresimin e amandamenteve dhe komenteve për secilin proces e dokument i cili trajtohet nga Asambleja, të cilat më herët është dashur të bëhen përmes delegacioneve të vendeve tjera, kryesisht Shqipërisë.
Po ashtu edhe deputeti i PDK-së, Xhavit Haliti ka thënë se Kosova pritet të pranohet partner i acociuar në Asamblenë Parlamentare të NATO-s, si rezultat i angazhimit shumëvjeçar të Delegacionit të Kuvendit të Kosovës.