Maresca e rikthen Leicesterin në Premier Ligë
Me dy ndeshje të mbetura për tu luajtur, trajneri Enzo Maresca ka siguruar rikthimin e Leicester City në Premier Ligë në sezonin e tij debutues.
Tekniku 44-vjeçar italian, i cili më parë ka punuar me Pep Guardiolan në Manchester City, mori drejtimin e Leicester në korrik të vitit të kaluar, pas rënies së klubit në Championship, me detyrën për t’i rikthyer ata sërish në elitën e futbollit anglez.
Për shkak të cilësisë së skuadrës së tyre dhe faturës së lartë të pagave, Leicester nuk mund të rrezikonte të humbiste një rikthim të menjëhershëm në ligën e parë, duke shtuar presionin mbi Marescan dhe skuadrën e tij. Gjërat dukeshin të thjeshta deri në shkurt, kur një formë e lëkundur shkaktoi shqetësime në klub.
“BBC Sport” theksoi se si humbja 4:0 e Leeds United ndaj Queens Park Rangers të premten në mbrëmje garantoi matematikisht promovimin automatik në Premier Ligë për Leicester Cityn, i cili tani qëndron katër pikë larg në krye të tabelës së Championship.
Pavarësisht rënies së vonë në formë, ishte një sezon debutues pozitiv dhe i suksesshëm për Marescan, i cili tani do të ketë mundësinë të provojë fuqinë e tij në Premier Ligë.