Lidhur me masat e reja anticovid-19 në Kosovë, Ministria e Shëndetësisë përmes një komunikate ka thënë se vendimet e sotme të Qeverisë së Kosovës janë marrë sipas propozimeve të MSh-së bazuar në situatën aktuale epidemiologjike, e cila gjatë këtij muaji ka rezultuar të jetë më e qetë.

Minstria ka treguar arsyen e lehtësimit të masave antiCovid.

“Bazuar në të dhënat e Institutit Kombëtar të Shëndetësisë Publike, shkalla e morbiditetit (sëmundshmërisë) nga infeksioni COVID-19 është 120/100.000 banorë, kurse shkalla e pozitivitetit të mostrave të testuara është 13.1%”, thuhet në reagimin e MSh-së duke theksuar se kjo është arsyeja pse janë ndërmarra disa masa “për t’i dhënë më shumë hapësirë veprimtarive të rëndësishme jetësore”.

Në bazë të vendimeve të sotme, parimisht, mbesin në fuqi pothuajse shumica e masave të ndërmarra më herët përveç heqjes së orës policore në komunat në “zonën e kuqe”, e cila tashmë si masë nuk ka ndonjë ndikim pozitiv, duke qenë që së fundi në këtë zonë kanë qenë vetëm katër komuna, si dhe kthimi i mësimit me prani fizike në fakultete, duke respektuar Manualin për parandalimin e përhapjes dhe luftimin e COVID-19.

Msh tutje ka thënë se kategorizimi i komunave do të vazhdojë të bëhet edhe më tej bazuar në numrin e rasteve pozitive në 100.000 banorë brenda një jave për të përcjellë ecurinë epidemiologjike sa i përket COVID-19.
Ndërsa, sa u përket testeve PCR për ata që hyjnë në Kosovë, Ministria e Shëndetësisë ka deklaruar se kjo masë ka qenë e vendosur edhe më parë dhe nuk është e re, dhe ka vlejtur për të gjithë udhëtarët që vijnë në Kosovë nga shtetet me rrezik të lartë sipas klasifikimit të ECDC-së dhe bazuar në parimin e reciprocitetit

“Sa u përket institucioneve ekzekutive dhe atyre këshillëdhënëse, Ministria e Shëndetësisë do të vazhdojë t’i trajtojë rekomandimet dhe çështjet që ngriten prej tyre, duke përcjellë me kujdes situatën epidemiologjike”, ka theksuar ministria duke shtuar se ndryshimi apo përkeqësimi eventual i situatës do të përcillet me masa adekuate, pa përjshtuar edhe kthimin e kufizimeve, ndërkohë që qytetarët rekomandohen që të veprojnë sipas udhëzimeve të IKSHPK-së për t’u mbrojtur nga infeksioni COVID-19./21Media