Mustafa i reagon Kurtit: LDK nuk cakton data
Mustafa ka një porosi për Lëvizjen Vetëvendosje
Kryetari i Lidhjes Demokratike të Kosovës, Isa Mustafa, ka thënë se LDK është angazhuar për marrëveshje për bashkëqeverisje me Vetëvendosjen mbi bazën e rezultateve zgjedhore të datës 6 tetor, të çertifikuara nga KQZ.
“Nga këto zgjedhje ka dalë LVV si fitues relativ me 29 deputetë dhe LDK, parti e dytë, me 28 deputetë. Nga zgjedhjet nuk ka fitues absolut, i cili jep ose është gjeneroz ndaj palës tjeter, por kemi një situatë ku përgjegjësia ndahet ndërmjet atyre që synojnë të bëhen partnerë në qeverisjen e ardhshme. Prandaj VV duhet të heq dorë nga diskursi se i ka dhënë diçka LDK-së. Lirisht mund ta themelojë qeverinë në qoftë se kanë votë të qytetarëve dhe mandate për ta bërë atë. LDK nuk ka kërkuar lëmoshë, por kemi ofruar gatishmërinë për t’i shërbyer qytetarit në partneritet të plotë, në proporcion me mandatet në Kuvend”, ka thënë Mustafa.
Mustafa ka thënë se LDK nuk cakton data. “Datat i cakton subjekti që del i pari në zgjedhe, ai që e merr mandatin për formimin e Qeverisë. Por, LDK insiston që sa më parë të kemi formim të institucioneve dhe kjo nuk do të thotë se LDK domosdoshmërisht do të bëhet pjesë e qeverisë”.
Tutje në shkrimin e tij në Facebook, Mustafa ka theksuar se është obligim i fituesit të zgjedhjeve që të shmang vonesat dhe t’i eliminojë pengesat për formimin e institucioneve. “Ne bëmë punën tonë, zhbllokuam procesin, përkundër që s’kishim marrëveshje e as njoftim se VV do të procedojë me Kryetarin e Kuvendit. Për hir të së vërtetës, LDK, jo që ka refuzuar por, ka vlerësuar se duhet ti takojë Kryeparlamentari me marrëveshje”.
Mustafa ka thënë se caktimi i mandatarit, marrja e manatit për Kryeministër dhe gjetja e zgjidhjes për formimin e qeverisë, në këtë fazë, është detyrim i subjektit që renditet i pari në zgjedhje.
Ndryshe, Lideri i Lëvizjes Vetëvendosje, Albin Kurti tha se Presidenti i Kosovës nuk ia përcakton datën e formimit të qeverisë, por këtë sipas tij e bën Lidhja Demokratike e Kosovës me të cilën janë në bisedime për koalicion qeverisës./21Media