Në Tiranë u protestua në mbështetje të Kosovës
Me moton “Dje, sot, nesër përjetë bashkë”, disa qytetarë të Shqipërisë, por edhe të Kosovës kanë protestuar të premten në Tiranë për situatën e tensionuar në veri të Kosovës.
Kjo protestë është nxitur nga qëndrimet e kryeministrit, Edi Rama për situatën në Kosovë, i cili ka kritikuar kryeministrin Albin Kurti për mos-koordinim me aleatët ndërkombëtarë si dhe ka hezituar të mbajë qëndrim për rrëmbimin e policëve të Kosovës nga forcat serbe brenda territorit të shtetit, shkruan Oranews.
Me flamujt e Shqipërisë dhe Kosovës në duar, ata kërkojnë më shumë mbështetje nga qeveria e Shqipërisë për Kosovën.
Protestuesit i kërkojnë Qeverisë shqiptare që të mos jetë e paanshme, por të jetë krah i Kosovës.
Ishte një thirrje e bërë një ditë më parë në rrjetet sociale që ftonte qytetarët të mblidheshin në sheshin para selisë së qeverisë në Tiranë.
Dëshiron ta dëgjosh këtë lajm me zë?