Nëse nuk ofrohet ndihma emergjente Prokuroria paralajmëron hetime
Sipas prokurorit Berisha, mosdhënia e ndihmës mjekësore është vepër penale
Si rrjedhojë e kërkesave për ngritje të pagës, drejtues të Federatës Sindikale e Shëndetësisë së Kosovës kanë paralajmëruar se kanë kërkesa për masa radikale, duke përfshirë edhe mos ofrimin e shërbimeve emergjente shëndetësore.
Nëse realizohet një kërkesë e tillë, Prokuroria paralajmëron nisjen e hetimeve për veprën penale, ‘mosdhënia e ndihmës mjekësore’.
Prokurori i Prokurorisë Themelore të Prishtinës, Ibrahim Berisha për KALLXO.com tha se nëse realizohet paralajmërimi për mos ofrim të shërbimeve emergjente shëndetësore do ta analizojnë situatën dhe do të hetojnë nëse ka elemente të veprës penale.
“Mosdhënia e ndihmës mjekësore është vepër penale, greva është e lejuar si e drejtë e garantuar por unë nuk e di se si mundet të bëhet diçka e tillë që të mos trajtohen rastet emergjente. Ne do t’i analizojmë të gjitha mundësitë dhe do të shohim se çfarë do të ndodhë, përndryshe do të hetojmë nëse nuk do të trajtohen rastet e natyrës urgjente”, tha prokurori Berisha, raporton Kallxo.com.
Ndërkohë, Shoqata e të Drejtave të Pacientëve sot kërkoi të ndërprehet greva.
Paga e mjekut specialist në Kosovë është rreth 600 euro në muaj, ndërsa infermieri paguhet rreth 300 euro në muaj.