Nitaj kërkon që Ekipi Negociator t’i ndërpresë takimet në Bruksel
“Trepçën as komunistët jugosllavë nuk e kanë parë si aset të Serbisë!”
Deputeti i Kuvendit të Kosovës nga radhët e grupit parlamentar të AAK-së, Muharrem Nitaj ka kërkuar nga Ekipi Negociator që t’i ndërpresë të gjitha takimet në Bruksel.
Kjo të ndodh sipas tij, deri të ketë një përgjigje zyrtare nëse deklarata e Maja Kocijanciqit për Trepçën është qëndrim i saj personal apo qëndrim i BE-së.
“Si deputet i Kuvendit të Republikës së Kosovës, kërkoj nga Ekipi Negociator që t’i ndërpresë të gjitha takimet në Bruksel, deri në një përgjigje zyrtare nëse deklarata e Maja Kocijanciq për Trepçën është qëndrim i saj personal apo qëndrim i BE-së!
Nëse është kjo e dyta, atëherë Kosova nuk duhet ta pranojë ndërmjetësimin e Federica Megerinit në këto bisedime.”, ka shkruar Nitaj në një status në rrjetin social, Facebook.
Muharrem Nitaj më tutje ka thënë që Trepçën as komunistët jugosllavë nuk e kanë parë si aset të Serbisë.
“Dhe për kujtesën e të gjithëve e posaçërisht të këtyre zyrtarëve të Bashkimit Evropian, në Trepçë ka filluar shkatërrimi i Jugosllavisë Komuniste!”, ka shkruar Nitaj.