OKB e shqetësuar për vaksinat e papërdorura
Organizata e Kombeve të Bashkuara është shqetësuar për situata ku vaksinat kundër COVID-19 kanë mbetur të papërdorura.
“Ne jemi shumë të shqetësuar për situata ku kemi parë se vaksinat kanë mbetur pa u përdorur. Ose për arsye administrative ose për shkak të mungesës së kujdesit të duhur, ose në fakt për shkak të hezitimit për vaksimin”, tha Stephane Dujarric, zëdhënës i OKB-së.
Ai theksoi se OKB është e gatshme t’i ndihmojë shtetet me shpërndarjen e vaksinave, por kjo mund të bëhet “vetëm në bazë të kërkesave të qeverive”.
Programi i shpërndarjes së vaksinave, COVAX deri më tani ka shpërndarë 186.2 milionë doza te 138 shtete.
Ndërsa sipas të dhënave të UNICEF-it, COVAX synon të sigurojë 2 miliardë doza për vende me të ardhura të ulëta dhe të mesme deri në fund të vitit 2021.
Shtetet e Bashkuara i kanë dhuruar më shumë se 110 milionë doza të vaksinës për afro 60 vende deri më tani, sipas Shtëpisë së Bardhë.
Dëshiron ta dëgjosh këtë lajm me zë?