Osmani: Liberalizimi duhet të ndodh, sepse Kosova i ka plotësuar kriteret 

 

Kryetarja e Kuvendit të Kosovës, Vjosa Osmani ka pritur në një takim shefin e Zyrës së BE-së, njëherësh përfaqësues special,  Tomas Szunyog. Kryetarja Osmani e ka uruar Szunyog për marrjen e detyrës duke shfaqur besimin për vazhdimin  bashkëpunimit ndërmjet të dy institucioneve.

Në komunikatën e dërguar për media thuhet se në takim u diskutua për zhvillimet aktuale politike në vend dhe u tha se Kuvendi i Kosovës nuk duhet të anashkalohet nga Qeveria e Kosovës në procesin e dialogut më Serbinë, ngase është institucioni  me i lartë ligjvënës dhe mbikëqyrës në politikën e jashtme.

“Osmani shprehu gatishmërinë që ky institucion të marrë rol më të madh në procesin e integrimeve evropiane, si një ndër proceset më të rëndësishme të shtetit të Kosovës. Ajo ka kërkuar që BE-ja t’i përmbushë obligimet e saj, ngase Kosova tashmë ka plotësuar kriteret e parapara për liberalizim vizash. Në këtë kontekst, Osmani ka thënë se sundimi i ligjit është prioritet dhe se kjo do të arrihet edhe në bashkëpunim me zyrën e BE-së në Kosovë”, thuhet tutje në komunikatë.

Ndërkaq Szunyog ka thënë se Zyra e BE-së e rikonfirmon rekomandimin e Komisionit Evropian të vitit 2018, sipas të cilit Kosova i ka plotësuar kriteret për liberalizim, porse vendimi mbetet  në kompetencë të shteteve anëtare të Këshillit të ministrave të BE-së. Ai, gjithashtu tha se Kosova duhet të përkushtohet në përmbushjen e kërkesave që dalin nga Marrëveshja e Stabilizim-Asociimit, duke potencuar se BE-ja do të mbetet edhe mëtej partner i Kosovës në rrugëtimin e saj.

Kryetarja Osmani ka falënderuar BE-së për ndihmën që i ka dhënë Kosovës në menaxhimin e pandemisë dhe ka kërkuar mbështetje të mëtutjeshme./21Media

Back to top button