Osmani: Në takim me Stoltenbergun përsërita përkushtimin e Kosovës për anëtarësim në NATO
(Lajm i përditësuar)
Osmani: Në takim me Stoltenbergun përsërita përkushtimin e Kosovës për anëtarësim në NATO
Presidentja Vjosa Osmani shkroi në Facebook se në takim me Sekretarin e Përgjithshëm Jens Stoltenberg, përsëriti përkushtimin e fortë të Kosovës për anëtarësim në NATO.
“Vendosmëria jonë për të kontribuar krahas aleatëve tanë për siguri dhe paqe afatgjate, në rajon e kudo në botë, mbetet e palëkundur!”, shkroi e para e shtetit.
Stoltenberg: Çdo zbarkim i forcave speciale kërkon pajtimin e KFOR-it
Çdo zbarkim i forcave speciale në veri të vendit duhet të bëhet në koordinim me NATO-n, ka thënë shefi i aleancës ushtarake, Jens Stoltenberg.
“Nuk është kriter i ri. Është baza e misionit për një kohë të gjatë tashmë. Çdo zbarkim i forcave speciale kërkon pajtimin e KFOR-it dhe ka nevojë për koordinim dhe konsultim të afërt mes autoriteteve në Prishtinë me çfarëdo lloj zbarkimi të forcave që mund të ndikojë pozitën tonë e sigurinë në Kosovë”, ka thënë Stoltenberg.
Osmani: BE-ja të ketë qasje të balancuar në dialog, në disa momente s’e kishte
Presidentja e Kosovës, Vjosa Osmani, ka thënë se shpreson që ndërmjetësuesi Bashkimi Evropian do të ketë qasje të balancuar në dialogun Kosovë – Serbi.
Osmani: Kosova sukses historik i NATO-s
‘’Kosova është sukses historik i NATO-s, ka forca keqdashëse që duan ta sfidojnë dhe ta rrënojnë atë. Nuk duhet ta lejojmë këtë’’ kështu tha Presidentja e Kosovës, Vjosa Osmani në konferencën e përbashkë me sekretarin e Përgjithshëm të NATO-s, Jens Stoltenberg .
Tutje Osmani ka shtuar se nuk do të lejojnë që veriu i Kosovës të jetë fushëbetejë për arritjet hegjemoniste të autokratëve rajonalë, duke aluduar në presidentin e Serbisë, Aleksandar Vuçiq.
“Jam këtu si dëshmi e orientimit strategjik të Kosovës. Jemi shumë mirënjohës për lidershipin e NATO-s në këtë kohë goxha të rëndë. Më lër të shpreh mirënjohjen e popullit të Kosovës për rolin e NATO-s për të shpëtuar jetët tona dhe rolin gjatë ditëve të sotme. E vlerësojmë rolin e NATO-s në zhvillimin e Kosovës’’ tha Osmani.
Osmani në emër të institucioneve shprehi gatishmërinë që në bashkëpunim me NATO-n t’i sjellin para drejtësisë kriminelët që sulmuan ushtarët e KFOR-it, gazetarët e njësitet policore në veri të Kosovës gjatë fund të majit.
Stoltenberg: Vazhdojmë ta monitorojmë situatën në veri të Kosovës
Pas takimit me Presidenten e Kosovës, Vjosa Osmanin, Sekretari i Përgjithshëm i NATO-s, Jens Stoltenberg, ka thënë r se i mirëpret hapat e fundit të Kosovës që i ka marrë për të shtensionuar situatën në veri të vendit.
Në konferencën e përbashkët me Osmanin, ai ka deklaruar se e mbështet edhe procesin e dialogut Kosovë-Serbi.
Ai tutje ka shtuar se dialogu është e vetmja mënyrë për të zgjidhur çështjet e mbetura pezull mes të dyja vendeve.
Stoltenberg ka deklaruar se mirëpret takimin Kurti-Vuçiq në Bruksel javën e ardhshme, ndërsa ka theksuar se ky takim “është mundësi për Kosovën që të demonstrojë se është palë e përgjegjshme që vepron në mënyrë konstruktive në dobi të sigurisë euroatlantike”.
Stoltenberg tutje ka shtuar se NATO vazhdon ta monitorojë situatën në veri të Kosovës.
“Për situatën e fundit në veri të Kosovës NATO ka zbarkuar qindra trupa dhe vazhdojmë ta monitorojmë situatën për të përmbushur mandatin tonë të OKB-së, për të ruajtur një mjedis të rregullt dhe liri të lëvizjes të të gjitha komuniteteve në Kosovë”, ka thënë Stoltenberg.
Osmani në Bruksel, takohet me shefin e NATO-s
Presidentja e Kosovës, Vjosa Osmani ka udhëtuar për në Bruksel për vizitë zyrtare në selinë e NATO-s.
Në njoftimin e Presidencës, bëhet e ditur se në orën 14:00, Osmani do të pritet nga Sekretari i Përgjithshëm i NATO-s, Jens Stoltenberg, me të cilin do të realizojë takim bilateral.
Pas përfundimit të takimit, Osmani dhe Sekretari i Përgjithshëm Stoltenberg do t’i adresohen gazetarëve në një konferencë të përbashkët për media.
Gjatë vizitës zyrtare në NATO, Presidentja do të ketë takim edhe me Kryetarin e Komitetit Ushtarak të NATO-s, Admiralin Rob Bauer.
Presidentja do të realizojë takime edhe me ambasadoren e Shteteve të Bashkuara në NATO, Julianne Smith si dhe me përfaqësues të shteteve të tjera aleate.
“Përgjatë vizitës, Presidentja Osmani do të riafirmojë vendosmërinë e popullit dhe institucioneve të Republikës së Kosovës për avancimin e rrugës drejt anëtarësimit në NATO, duke filluar me programin e Partneritetit për Paqe, forcimin e bashkëpunimit dhe koordinimit me aleatë, në veçanti për çështje të sigurisë, mirënjohjen e popullit të Kosovës për rolin dhe kontributin e vazhdueshëm të NATO-s në Kosovë, si dhe përkushtimin për kontribut të përbashkët për paqe, stabilitet dhe siguri afatgjate në rajonin tonë”, thuhet në njoftim./21Media
Dëshiron ta dëgjosh këtë lajm me zë?