“Prekazi, kryeqytet i kryengritjes shqiptare”

(Lajm i përditësuar)
Kurti: Prekazi, kryeqytet i kryengritjes shqiptare
Kryeministri i Kosovës, Albin Kurti, e quajti Prekazin kryeqytet i kryengritjes shqiptare, ndërsa familja Jashari, tha se kujtohet me mall dhe me krenari.
“Para 25 vjetëve, 3 breza të Jasharajve luftuan 3 ditë rresht me mijëra forca policore të Serbisë që e kishin rrethuar kullën e Jasharajve, në mënyrë të shumëfishtë. Ranë gjithsej 59 veta. Ne kthehemi e rikthehemi në kryeqytetin e kryengritjes shqiptare për ta kujtuar e përkujtuar epopenë e UÇK-së, që i dha hov dhe mundësoi çlirimin dhe lirinë e vendit tonë”, tha Kurti.
Sipas tij, zhvillimi ekonomi bëhet pa harruar se kujt ia kemi borxh për lirinë,.
Konjufca: Rrënjët e vërteta të UÇK-së janë në luftën e lavdishme të Jasharëve
Kryetari i Kuvendit të Kosovës, Glauk Konjufca ka thënë se rrënjët e vërteta të UÇK-së janë në luftën heroike e të lavdishme të Jasharëve.
Ai ka thënë se pas luftës heroike dhe pas flijimit të 59 anëtarëve të familjes Jashari, UÇKu bë i gjithë populli i Kosovës.
“Përveç kësaj edhe Bashkësia Ndërkombëtare lëvizi dhe e kuptoi luftën tonë mbrojtës. Për popullin e Kosovës kjo mbetet një ndër ngjarjet më të rëndësishme”, ka thënë ai.
Osmani: Regjimi gjenocidal i Serbisë nuk kurseu as fëmijët e familjes Jashari
Presidentja e Kosovës, Vjosa Osmani ka thënë se sikurse çdo qytetar i Kosovës dhe çdo shqiptar, janë sot në Prekazin historik.
Ajo ka thënë se këto data janë mundësi e mirë që çdo qytetar të tregojë përkujtimin e tij për gratë dhe fëmijët e familjes Jashari.
“Ata nuk i kurseu regjimi gjenocidal i Serbisë. Siç e dini në mesin e të vrarëve kishte edhe fëmijë 5-vjeçar dhe kujtimi për ta do të jetë i përjetshëm”, ka thënë ai.
Osmani ndan për Rifat Jasharin “Urdhrin e Lirisë”
Presidentja e Kosovës, Vjosa Osmani i ka ndarë Rifat Jasharit “Urdhrin e Lirisë”. Këtë e ka bërë në një vizitë në shtëpinë e Jasharëve në 25-vjetorin e Epopesë së UÇK-së.
Osmani bashkë me kryeministrin Albin Kurti kryeparlamentarin Glauk Konjufca dhe anëtarë të tjerë të kabinetit qeveritar kanë bërë homazhe te varret e familjes Jashari në Prekaz.
Krerët shtetërorë bëjnë homazhe në Prekaz
Presidentja e Kosovës, Vjosa Osmani, kryetari i Kuvendit, Glauk Konjufca dhe kryeministri Albin Kurti kanë bërë homazhe tek varrezat e familjes Jashari në Prekaz, në nderim të 25-vjetorit të Epopesë së Ushtrisë Çlirimtare të Kosovës.
Të udhëhequr nga komandanti i FSK-së, Bashkim Jashari, ata vendosën kurora lulesh të freskëta në kompleksin memorial “Adem Jashari” në Prekaz, mirëpo, ata nuk u prononcuan për medie.
Sot është dita e dytë e Epopesë së lavdishme të Ushtrisë Çlirimtare të Kosovës.
Gjatë ditës homazhe bën edhe krerët opozitarë në Kosovë dhe qytetarë të shumtë nga vise të ndryshme.