Pacolli insiston t’i ndërtojë me para të tij ndërtesat shtetërore

Kryetari i AKR-së, Behgjet Pacolli, ka thënë se me vetfinancim është duke insistuar që të ndërtohen mbi 900 mijë metra katrorë ndërtesa që përfshijnë qeverinë, ambasadat, agjencitë dhe të tjera që lidhen me administratën shtetërore.
Pacolli përmes një shkrimi në “Facebook” ka thënë se këto ndërtesa të ndërtohen në zonën e Hajvalisë.
“Kaloj çdo ditë në zonat e Hajvalisë ku kam (dhe jam) duke insistuar që (me vetëfinancim) të ndërtohen ndërtesa (mbi 900,000m2) për qeverinë, ambasadat, agjencitë dhe gjithçka që lidhet me administratën e drejtimit të shtetit të Kosovës. Për arsye të pakuptueshme për mua, kjo nuk ndodhi”, ka shkruar Pacolli.
Kreu i AKR-së, po ashtu i ka bërë thirrje kryetarit të Prishtinës që ta bëjë të njëjtën me ligjin në fuqi.
“Unë kam besim në vizionin e Përparim Ramës dhe i bëj thirrje që ai ta bëjë këtë. Me ligjin në fuqi të Prishtinës,me kreativitet, guxim dhe dëshirë, ju mund ta bëni këtë! Ndërtoni qytetin e ri administrativ, hiqni administratën nga qyteti dhe çlirojeni nga mbytja e mëtejshme (do të ulni trafikun në Pr me më shumë se 60%)! Tashmë Prishtinën e shpëtojnë vetëm projektet e mëdha!!”, ka thënë ai./21Media