“Para të GEN-it për fushatën e Kurtit”, Kryeziu: Pretendime të pavërteta të portalit slloven

Zëdhënësi i Qeverisë së Kosovës, Përparim Kryeziu, ka reaguar pasi që media sllovene “Prava” ka raportuar se kryeministri Albin Kurti, ka përfituar miliona euro nga kompania “GEN” për fushatën e Lëvizjes Vetëvendosje.
Teksti flet për 100 milionë euro, të cilat thuhet se janë menaxhuar nga kompania “GEN”. Në këtë aferë thuhet se janë të përfshirë kryeministri Albin Kurti dhe ambasadori i Kosovës në Slloveni, Martin Berishaj.
Por sipas Kryeziut pretendimet janë të pavërteta. “Luka Pers, njëri ndër themeluesit e portalit Prava, është një pseudogazetar që ka punuar deri vonë për Nova24TV, organizatë lajmesh e ekstremit të djathtë. Portali është aq i parëndësishëm sa që mezi e gjen online … pretendimet e një portali të themeluar nga një pseudogazetar që ka punuar në një organizatë lajmesh të ekstremit të djathtë, llogaria në Tëitter i të cilët është suspenduar për shkak të shpërndarjes së lajmeve të rreme, patjetër se janë të pavërteta”, ka shkruar Kryeziu në Facebook.
Ai ka kritikuar edhe mediat në Kosovës të cilat e kanë shpërndarë raportimin e kësaj medie.
“Shpërndarja e këtij ‘lajmi’ nga një portal aq i dyshimtë në disa prej portaleve tona, pa ndonjë verifikim të historikut të Prava dhe profilit të Luka Pers, është në rastin më të mirë jo profesionale dhe jo etike. Sidomos kur dihet se në vitin 2021, llogaria e Luka Pers në Twitter është suspenduar pikërisht për shkak të shpërndarjes së lajmeve të rreme. E trajtimi nga partitë opozitare i një “lajmi” të tillë si temë nacionale, është më së paku shterpërsi opozitare”, ka shkruar Kryeziu.
LDK kërkoi sot nga qeveria adresim për hulumtimin e gazetës sllovene në lidhje me 100 milionë euro, në të cilën sipas tyre, dyshohet se është përfshirë edhe kryeministri i vendit, Albin Kurti.