Sveçla ministri më i pasur në Qeverinë Kurti

Ministri i Punëve të Brendshme, Xhelal Sveçla, ka deklaruar pasurinë e tij në Agjencinë për Parandalimin e Korrupsionit.

Ai llogaritet të jetë ministri më i pasur në Qeverinë Kurti, pasi ka deklaruar se ka një shtëpi të përbashkët 600 mijë euro dhe një lokal në vlerë 650 mijë euro. Sveçla gjithashtu është aksionar me bashkëshorten e tij në ordinancën stomatologjike “Dental Advanced Services Dhomi”, në vlerë 100 mijë euro.

Sveçla ka deklaruar se para të gatshme bashkë me gruan e tij kanë rreth 8.400 euro, teksa ka dy kredi – një në vlerë 15 mijë euro dhe një në vlerë 5 mijë euro. Po ashtu ka deklaruar një kredi në vlerë mbi 28 mijë euro në emër të gruas.

Pagën vjetore e ka deklaruar në vlerë 16.630 euro, derisa mëditje nga udhëtimet zyrtare ka marrë në vlerë 2.280 euro.