Përfundon ndeshja mes Lirisë e Vushtrrisë, kjo skuadër do të luftojë në barazh

Ka përfunduar ndeshja tejet interesante mes skuadrës së Lirisë dhe asaj të Vushtrrisë, e vlefshme kjo për të caktuar skuadrën që do të luftojë në barazh për një vend në Superligën e Kosovës.
Pas 120’ minutave lojë të zhvilluara në stadiumin “18 qershori”, fituesi mes Lirisë e Vushtrrisë është përcaktuar me ndihmën e penalltive.
Koha e rregullt është mbyllur me rezultat të barabartë 1:1, ndërsa në vazhdime nuk ka pasur gola, kurse në penallti, skuadra e Vushtrrisë ka siguruar fitoren me rezultat 5:3.
Fillimisht, rezultatin i pari e ka zhbllokuar Liridon Fetahaj, i cili në minutën e 45+4’ shtesë nga penalltia e ka kaluar Lirinë në epërsi.
Golin e barazimit dhe të fundit brenda kohës së rregullt të kësaj ndeshjeje e ka shënuar Labinot Osmani, i cili me ndihmën e penalltisë e ka barazuar rezultatin në 1:1 në minutën e 52’ për Vushtrrinë.
Ndërkaq, në fazën e penalltive, Vushtrria ka qenë e suksesshme 100%, kurse te Liria penalltinë e ka humbur Viktor Kuka.
Me këtë fitore, Vushtrria vazhdon në luftën e barazhit, me ç’rast do të përballet me vendin e tetë në Superligën e Kosovës.
Nga ana tjetër, skuadrat që në Superligën e Kosovës janë duke luftuar për t’i ikur vendit të tetë dhe rrjedhimisht ndeshjes së barazhit janë Malisheva, Dukagjini, Drenica dhe Prishtina.