Përveç përdorimit, do të ndalohet edhe shitja e thëngjillit

Matoshi tha se do të konfiskohet thëngjilli kudo në Prishtinë

Ministri i Mjedisit dhe Planifikimit Hapësinor, Fatmir Matoshi, ka bërë të ditur se kanë filluar me konfiskimin e thëngjillit në të gjitha rrugët e kryeqytetit. Në kuadër të kësaj, tek po raportonte para Komisionit për Bujqësi, Pylltari dhe Zhvillim Rural, lidhur me gjendjen e mjedisit në Kosovë, Matoshi bëri të ditur se së shpejti do të aktivizohet edhe Policia e Gjelbër. Sipas tij, gjendja e mjedisit për vitin 2017 tregon për një gjendje jo të mirë përkundër përpjekjeve për mbrojtjen e tij.

Matoshi, tha se në ndotjen e ajrit ka ndihmuar edhe dhënia falas e thëngjillit për punëtorët e KEK-ut.

“Ka pasur raste që ky thëngjill ka përfunduar me shitje. Po ashtu jemi në plan të konfiskimit të thëngjillit kudo në qytetin e Prishtinës. Ditëve në vijim do të ketë aksione për konfiskim në rrugët e Prishtinës. Sa i përket ekonomive familjare, nuk kemi mundur të marrim vendim pasi që thëngjilli përdoret edhe në institucione”, tha ministri Matoshi.

Ndërsa kryeshefi i Agjencionit për Mbrojtjen e Mjedisit, Ilir Morina, u shpreh se në prill do të dalin me një raport të detajuar. Ai shtoi se tejkalimet e ndotjes së ajrit kanë filluar para 3 javësh. Ai tha se problemi shfaqet kur nuk ka erë.

“Energjetika është ndotësi më i madh dhe termocentralet mbesin ndotësit më të mëdhenj. Kemi ngritje të oksideve të azotit, që dalin nga ‘auspuhi’ i automjeteve. Shumica e automjeteve janë shumë të vjetra dhe nuk kanë katalizatorë. Një problem që Agjencia është duke hulumtuar është edhe produkti i ‘peletit’. Është produkt që kontrollohet nga Ministria e Tregtisë, por si duket mund të jetë më i pashëndetshëm se sa thëngjilli”, tha ai.

Kryetari i Komisionit, Muharrem Nitaj, u shpreh i pakënaqur që deri në muajin prill nuk do të kenë një raport të detajuar.

“A e keni shqyrtuar që të bëhet ndërprerja e përdorimit të thëngjillit në banesat kolektive”, parashtroi ai. Pas kësaj, mbledhja e sotme u shty për shkak të seancës së jashtëzakonshme.

Deputeti i Vetëvendosjes, Salih Zyba, shprehi pakënaqësitë e tij pasi që tha se shumë pak u fol për raportin. Pas ndërprerjes ka mbetur që brenda kësaj jave të caktohet dita për vazhdimin e kësaj mbledhjeje.

Javën e kaluar në mbledhjen e Qeverisë u aprovua vendim-propozimi për ndalimin e përdorimit të thëngjillit nëpër institucionet publike. Sipas tij, ky vendim ka të bëjë vetëm me institucionet publike, dhe ato duhet të përdorin mënyra tjera alternative.