Policia kërkon ndihmë për gjetjen e 13 vjeçarit nga Prizreni

Policia e Kosovës ka bërë publike fotografinë e 13-vjeçarit, Ender Cahanit nga Prizreni, të cilin nëna e tij më 10 dhjetor të këtij viti e kishte raportuar si të zhdukur.
“Jeta Cahani, nëna e Ender Cahanit nga Prizreni, me datë 10 Dhjetor 2022 ka raportuar në polici zhdukjen e djalit të saj të mitur. Ender Cahani, nga e ëma Jeta, lindur me datë 09.08.2009 nga Prizreni, Republika e Kosovës, për herë të fundit është parë nga e ëma e tij me datë 08 Dhjetor 2022 në ora 18:20, kur ka dalë nga shtëpia dhe nëna e tij më nuk ka asnjë kontakt me të”, bëhet e ditur në njoftimin e Policisë së Kosovës.
Policia e Kosovës ka kërkuar bashkëpunimin e qytetarëve për gjetjen e një fëmije nga Prizreni, i cili është i zhdukur tash e pesë ditë.
“Sipas ankuesit viktima është: mashkull, me peshe mesatare, flokët të shkurtra, 13 vjeçar. Ankuesja thotë se edhe tjetër here ka ndodhur që fëmija të largohet nga shtëpia dhe është kthyer prapë, por tani nga koha e largimit të tij nga shtëpia ajo më nuk ka asnjë kontakt. Personi i raportuar si zhdukur deri me sot nuk është gjet, andaj kërkojmë bashkëpunim nga të gjithë qytetarët, që nëse e shohin personin (fëmijën) e njëjtë apo din diçka për vendndodhjen e tij të raportojnë Policin Rajonale në Prizren, apo në cilin do stacion të policisë në Kosovë”, ka njoftuar Policia e Kosovës./21Media