Qeveria e Kosovës, ua lejon personave mbi 60 vjet të dalin në punë. Në vendimin e qeverisë përshkruhet që vetëm personat  me sëmundje kronike dhe gratë shtatzëna lirohen nga paraqitja në punë, punëdhënësit, ndërkaq obligohen tu krijojnë kushte për angazhimin e tyre on line nga shtëpia.

Kjo u bë e ditur nga kryeministri i Kosovës, Avdullah Hoti në një përgjigje për RTV21, pas homazheve për Afrim Zhitinë dhe Fahri Fazliun.

Të shtunën kur u prezantuan masat e reja për mbrojtje nga pandemia, thuhej  se personat e  moshës mbi 60 vjeç obligohen që të punojnë nga shtëpia. Kjo ngjalli reagime  të njohësve të drejtësisë pasi  nëse personat e kësaj moshe nuk mund të dalin në punë, i bie që asnjë gjykim apo hetim nuk mund të zhvillohet. Mos prania e gjyqtarëve të kësaj moshe, prokurorëve apo avokatëve  nëpër seanca gjyqësore, do të shkaktonte dështim dhe shtyrje pafund të gjykimeve./21Media