Reagon SPK për sulmet dhe kërcënimet ndaj policëve
Sindikata e Policëve të Kosovës (SPK), ka reaguar ndaj sulmeve që po bëhen ndaj policëve.
SPK thotë se janë të shqetësuar për sulmet dhe kërcënimet.
“Sindikata e Policisë brengoset dhe shpreh pakënaqësinë e saj ndaj rasteve, sulmeve dhe kanosjeve ndaj policëve dhe nuk do të tolerojë që këto raste të përsëriten e të ndodhin ndaj policëve”, thuhet në reagimin e Sindikatës së Policëve të Kosovës.
“Sindikata e Policisë së Kosovës dënon këto veprime, duke ju rikujtuar të gjithëve se zyrtarët policorë me gjithë lodhjen fizike dhe psiqike janë të përgatitur profesionalisht dhe janë në gjendje gatishmërie ta mbrojnë vetveten e tyre dhe çdo qytetar të Republikës së Kosovës, duke respektuar vendimet e Qeverisë për respektimin e masave, ku në këtë kohë të vështirë Policia e Kosovës është e obliguar të dalë në terren dhe të ndërmarrë masa konform ligjeve pozitive të vendit në parandalimin dhe luftimin e pandemisë ” Covid-19″”, thuhet në reagim.
Në reagim tutje thuhet se policët janë të angazhuar me orar 12 orësh dhe kjo paraqet barrë shtesë për shëndetin fizik të zyrtarëve policorë, përpos rrezikut nga pandemia, që duhet t’i ekspozohen duke bërë kontrolle të kohëpaskohshme të qytetarëve dhe të automjeteve.
“Iu bëjmë thirrje të gjithë qytetarëve të Republikës së Kosovës, jemi duke kaluar nëpër një periudhë të vështirë kohore të një pandemie, sot më shumë se kurrë na duhet bashkëpunimi me qytetarët e Republikës sonë dhe jo sulmet fizike ndaj policëve të cilët po kryejnë detyrën e tyre zyrtare, në mbrojtje të rendit dhe ligjit. Sindikata e Policisë brengoset dhe shpreh pakënaqësinë e saj ndaj rasteve, sulmeve dhe kanosjeve ndaj policëve dhe nuk do të tolerojë që këto raste të përsëriten e të ndodhin ndaj policëve. Iu bëjmë thirrje organeve ligjvënëse dhe kompentente që dënimet e tilla të jenë më rigoroze dhe të më të ashpra ndaj personave të pandërgjegjshëm, meqenëse numri i sulmeve çdo ditë e më shumë po shtohet në forma të ndryshme nënçmuese ndaj zyrtarëve policorë që i përkasin një institucioni më të besuar në vend”, thuhet në reagim./21Media