Rohde thotë se në veri kishte sulm terrorist, kërkon të vazhdohet dialogu

Ambasadori i Gjermanisë në Kosovë, Jorn Rohde, ka thënë se sulmi kriminal ndaj policëve të Kosovës në Banjskë të Zveçanit nënvizon nevojën për t’i vazhduar bisedimet e dialogut.

Ai këtë deklaratë e ka bërë derisa ka shpërndarë një postim në platformën ‘X’ të emisarit të BE-së, Miroslav Lajçak i cili është takuar me këshilltarët e lartë të krerëve të Francës, Gjermanisë e Italisë, me pjesëmarrjen e të dërguarit të posaçëm të Shteteve të Bashkuara të Amerikës, Gabriel Escobar.

“Sulmi i tmerrshëm kriminal dhe terrorist i së dielës kundër oficerëve të zbatimit të ligjit në Kosovë nënvizon nevojën urgjente për të vazhduar bisedimet e dialogut dhe zbatimin e marrëveshjes së Ohrit tani”, ka thënë ai.

Sunday’s heinous criminal and terrrorist attack against Kosovo law enforcement officers underlines the urgent need to continue Dialogue talks and the implementation of the Ohrid agreement now https://t.co/Qk0TBXuUn3

— Ambassador Jörn Rohde (@GermanAmbKOS) September 26, 2023

Në orët e para të mëngjesit të së dielës në Banjskë të Zveçanit nga sulmues serbë është vrarë një polic e janë plagosur tre, një prej tyre me armë zjarri. Të vdekur kanë mbetur edhe tre sulmues serbë. Aktualisht gjashtë persona janë arrestuar, njërit prej tyre i është caktuar paraburgimi prej një muaji.