Rrëmbimi në Teksas: Dy adoleshentë të arrestuar si pjesë e hetimit për incidentin
Dy adoleshentë janë arrestuar në Angli si pjesë e hetimit për një incident të marrjes peng në një sinagogë në Teksas të shtunën.
Shtetasi britanik Malik Faisal Akram, 44 vjeç, nga Blackburn, u qëllua për vdekje pas një përplasje me policinë në Colleyville.
Detajet e moshës apo gjinisë së çiftit të arrestuar në jug të Mançesterit të dielën në mbrëmje nuk u zbuluan.
Policia e Mançesterit tha se po ndërlidhej me komunitetet lokale dhe po vazhdonte të ndihmonte në hetimin e SHBA-së.
Gjithashtu, u tha se dy adoleshentët u arrestuan “si pjesë e hetimit në vazhdim për sulmin” dhe po mbaheshin në paraburgim për t’u marrë në pyetje.
Sipas burimeve të policisë amerikane, Akram mbërriti në vend përmes aeroportit ndërkombëtar JFK të Nju Jorkut dy javë më parë.
Vëllai i Akramit, Gulbar, konfirmoi vdekjen e tij në një deklaratë të publikuar në faqen e Facebook të Komunitetit Musliman të Blackburn. Ai u kërkoi falje viktimave dhe tha se vëllai i tij vuante nga probleme të shëndetit mendor, transmeton rtv21.tv
Policia Metropolitane më herët konfirmoi se oficerët e kundër-terrorit ishin në kontakt me autoritetet amerikane dhe FBI-në.
Rrethimi filloi rreth orës 11:00 me orën lokale (16:00 GMT) kur policia u thirr në sinagogën e Kongregacionit Beth Israel në periferi të Dallasit.
Akram fitoi hyrjen fillestare në sinagogë gjatë shërbimit duke pretenduar se ishte një i pastrehë, sipas një burimi policor.
Mes pengjeve ishte edhe rabini i sinagogës. Njëri u lirua pas gjashtë orësh dhe tre të tjerët u çuan në siguri nga policia disa orë më vonë.
Të gjithë pengjet në sinagogë u liruan të padëmtuar.
Presidenti i SHBA-së, Joe Biden e quajti marrjen e pengjeve një “akt terrori” dhe Britania e Madhe e dënoi sulmin.
Sekretarja e Jashtme britanike Liz Truss e përshkroi atë si një “akt terrorizmi dhe antisemitizmi”.
“Ne qëndrojmë me SHBA-në në mbrojtjen e të drejtave dhe lirive të qytetarëve tanë kundër atyre që përhapin urrejtje”, Truss tha në një postim në Twitter./21Media