Rusia ndal furnizimet me naftë në Poloni

Rusia i ka ndalur furnizimet me naftë në Poloni përmes gazsjellësit Druzhba, ka thënë Daniel Obajtek, shefi i rafinerisë polake të naftës, Orlen.
Megjithatë, ndikimi besohet se është i neglizhueshëm.
Obajtek ka thënë se kompania ka qenë “plotësisht e përgatitur” për këtë skenar.
“Vetëm 10 për qind e naftës së papërpunuar ka qenë duke ardhur nga Rusia, dhe ne do ta zëvendësojmë atë me shtetet tjera furnizuese”, ka shkruar ai.
“Ky është rezultat i diversifikimit të kryer në vitet e fundit”.
Orlen ka thënë se mund t’i sigurojë furnizimet plotësisht nga rrugët detare, që nënkupton se ndalesa ruse nuk do të ketë ndikim në disponueshmërinë e produkteve të saj me pakicë, si benzina.
Druzhba njihet si një prej gazsjellësve më të mëdhenj në botë dhe furnizon me naftën ruse shumë shtete në Evropën Qendrore.
Gjermania është furnizuar, po ashtu, përmes kësaj rruge, mirëpo ka hequr dorë vullnetarisht pas nisjes së luftës së Rusisë në Ukrainë.