SHBA: Pretendimi i Rusisë se po tërhiqet, nuk është i vërtetë

Pretendimi i Rusisë se po lëviz trupat nga kufiri me Ukrainën është “i rremë”, sipas një zyrtari të lartë amerikan, i cili shtoi se 7000 ushtarë shtesë kishin mbërritur ditët e fundit.
Zyrtari tha gjithashtu se Rusia mund të lëshojë një justifikim “të rremë” për të pushtuar Ukrainën “në çdo kohë”.
Moska thotë se po lëviz trupat jashtë kufirit ukrainas pas përfundimit të stërvitjeve ushtarake.
Por zyrtarët perëndimorë thonë se nuk kanë parë asnjë provë për të mbështetur pretendimin.
“Rusia duhet të ndërmarrë hapa të vërtetë drejt de-përshkallëzimit,” ranë dakord presidenti amerikan Joe Biden dhe kancelari gjerman Olaf Scholz në një bisedë telefonike të mërkurën, sipas zyrës gjermane.
Rusia – e cila ka mohuar vazhdimisht planifikimin e një pushtimi të Ukrainës, pavarësisht se ka mbledhur më shumë se 100,000 trupa pranë kufirit – e quan “histeri” shqetësimin e Perëndimit për pushtimin.
Të mërkurën, Ministria e Mbrojtjes publikoi një video që dyshohet se tregon tanke që largohen nga Krimea, të cilën Rusia e aneksoi nga Ukraina në vitin 2014.
Por sipas një zyrtari të lartë të Shtëpisë së Bardhë, mijëra trupa kanë mbërritur në zonë ditët e fundit – duke përfshirë disa të mërkurën.
Duke iu drejtuar gazetarëve, zyrtari amerikan vuri në dyshim pretendimin e Rusisë “se ajo po tërhiqte trupat nga kufiri me Ukrainën”.
“Ata tërhoqën shumë vëmendje për shkak të atij pretendimi, si këtu dhe në mbarë botën. Por tani e dimë se ishte i rremë.”,raporton CNN dhe BBC./21Media