Shënohet Dita Ndërkombëtare e Sportit për Zhvillim dhe Paqe

Komiteti Olimpik i Kosovës (KOK) shënoi sot Ditën Ndërkombëtare të Sportit për Zhvillim dhe Paqe me aktivitete të ndryshme.

Ky aktivitet ishte paraparë që të zhvillohet më datën 6 të këtij muaji, por si pasojë e kushteve atmosferike është shtyrë deri sot.

Në aktivitetet e sotme, ku u praktikuan sporte të ndryshme, morën pjesë qindra nxënës nga shkollat fillore, “Faik Konica”, “Naim Frashëri” dhe “Iliria”.

Fëmijët shpalosën fletë të bardha dhe flamurin e bardhë përmes të cilëve përçuan mesazhin e paqes në botë, siç është rekomanduar nga organizata ndërkombëtare “Peace and Sport”.

Aktivitetit të sotëm iu bashkua edhe organizata ndërkombëtare “Play International”.