Shënohet 32-vjetori i rënies së heroit, Zija Shemsiu

Komuna e Gjilanit sot shënoi 32-vjetorin e rënies së heroit Zija Shemsiu

Zyrtarë komunalë të Gjilanit kanë bërë të premten homazhe te lapidari i dëshmorëve në fshatin Përlepnicë të Gjilanit, në 32-vjetorin e rënies së dëshmorit Zija Shemsiu, që përkon edhe me 5 majin Ditën e Dëshmorëve.

Nënkryetari i Komunës së Gjilanit, Rexhep Kadriu tha se 32 vjet më parë familja Shemsiu është angazhuar sikur edhe shumë familje të dëshmorëve dhe heronjve për lirinë dhe çlirimin nga një okupator i cili për shqiptarët në Kosovë, përherë do të mbetet famëkeq dhe gjithmonë barbar e torturues.

“Zija Shemsiu dhe bashkëveprimtarët e tij janë ata, të cilët kanë qenë pjesë e celulave të para të lirisë së Kosovës, së bashku edhe me kontributin e dëshmorëve si Rexhep Mala, Nuhi Berisha, Kadri Zeka e deri te vargu i gjatë i dëshmorëve dhe heronjve të luftës së fundit të ’99-tës”, ka thënë ai.

Kadriu gjithashtu ka uruar të gjitha familjet e dëshmorëve për ditën e 5 majit, duke bartur mesazhin e falënderimit për kontributin e jashtëzakonshëm që ato si familje kanë dhënë për lirinë e Kosovës duke humbur më të dashurit e tyre.

Në emër të familjes ka folur Shaban Shemsiu, vëllai i dëshmorit Zija Shemsiu, i cili ka falënderuar institucionet komunale për respektin e treguar duke kujtuar vendimin e Zijahit i cili ka deklaruar para organeve të hetuesisë në Beograd se “Më mirë dua armën më të mirë të botës, se sa të jem mbret i saj”.

“Kjo ishte ajo që neve si familje krahas dhembjes së madhe na ka dhënë krenarinë e pafund që kishim një familjar, vëlla të tillë nga Përlepnica dhe Gjilani”, ka thënë Shemsiu./21Media