Shqipe Pantina i bashkohet LDK-së

“Shqipe Pantina nga sot është pjesë e Lidhjes Demokratike të Kosovës. Ajo i bashkohet shtëpisë sonë politike si një profesioniste me përvojë të shquar në jetën publike”, kështu ka thënë kreu i LDK-së, Lumir Abdixhiku përmes një postimi në “Facebook”.
Pantina ka shërbyer për dy mandate si deputete e Kuvendit të Kosovës. Para angazhimit politik, ajo ishte pjesë e shoqërisë civile, sikurse dhe konsulente në projekte të ndryshme ndërkombëtare me organizata prestigjioze si USAID, BE, OSBE, NDI, IFES e IREX.
“Shqipja i ka të mbaruara studimet bazike në Universitetin e Prishtinës, Fakultetin e Shkencave Politike, ndërsa ka magjistruar në Universitetin e Gracit në Austri, në fushën e studimeve evropiane. Në vitin 2012 ka specializuar në Universitetin e Indianas të ShBA-ve në fushën e sistemeve zgjedhore”, ka shkruar Abdixhiku në “Facebook”.
Abdixhiku ka thënë se është jashtëzakonisht i lumtur për ardhjen e Shqipes në LDK.
“Jam jashtëzakonisht i lumtur për ardhjen e Shqipes në LDK. Ajo përveç se pasuron radhët tona politike, vazhdon ciklin e bashkëngjitjeve që anëtarë të jetës publike, politike, medias e shoqërisë civile po e bëjnë me LDK-në. Lidhja Demokratike e Kosovës sot është bërë adresa e vetme e profesionistëve të tillë. Nga këtu, kështu, e kemi për obligim t’i ofrojmë qytetarëve të vendit platformë politike të denjë për rrugëtimin e ardhëm që Kosova e meriton. Shqipe, mirë se vjen!”, ka shkruar kryetari i LDK-së.
Ish-deputetja e VV-së, Shqipe Pantina së fundmi ishte analiste e çështjeve politike./21Media