Shqipëria përfshihet nga zjarret

Zjarrvënia dyshohet se ishte e qëllimshme

Gjatë 24 orëve të fundit në të gjithë Shqipërinë kanë ndodhur 12 vatra zjarri, ndërsa në operacionet për shuarjen e flakëve u angazhuan 115 zjarrfikës me 13 automjete, forcat ushtarake, vullnetarë si dhe helikopterë.

Një zjarr masiv ka ndodhur pasditen e sotme mbi fshatin Goricë në Dropull të Shqipërisë.

Zjarrvënia, që dyshohet se ishte e qëllimshme, rrezikoi seriozisht disa banesa dhe kishën e Shën e Premtes.

Në një situatë të tillë, forcat zjarrfikëse u bëjnë apel barinjve që të tregohen të kujdesshëm.

Ndërkohë, pyjet në Dibër vazhdojnë të digjen nga flakët. Një tjetër vatër zjarri u riaktivizua në Klos, duke rrezikuar dy banesa të braktisura, ndërsa në ndihmë të zjarrfikësve kanë shkuar 40 forca ushtarake dhe një helikopter për ndërhyrje nga ajri. Më herët, një vatër e madhe zjarri shkatërroi një sipërfaqe të madhe me pemë të larta në zonën e Bulqizës. Aty, bashkë me zjarrfikësit, edhe banorët punuan për të mbajtur nën kontroll flakët.

Ndërsa në fshatin Mavrovë të Selenicës flakët përfshinë një sipërfaqe me shkurre dhe ullishte.