Sindikata e Infermierëve, mamive dhe profesionistë tjerë shëndetësorë të Kosovës do të mbajë të mërkurën protestë, në shenjë pakënaqësie për mos rritje të pagesës së ndërrimeve të natës, rrezikshmërisë në punë, orëve shtesë dhe mos ekzekutimit të shtesave në pagë prej 300 eurove.

Vendimi është marrë në mbledhjen e Këshillit Organizativ për protesta, i cili përmes nënshkrimeve mori mbështetjen e mbi 700 infermierëve, mamive dhe profesionistëve tjerë shëndetësorë brenda SHSKUK/QKUK-së.

“Nëse edhe këtë herë nuk do të ketë reflektim nga ana e institucioneve, Sindikata e Infermierëve të Kosovë në mbledhjen e radhës së kryesisë së sindikatës së bashku me këshillin organizativ, do të koordinohet për masa tjera sindikale të bazuara në Ligjin mbi organizimin sindikal, të cilat do të jenë më radikale”, u bë e ditur në komunikatë.

Ndryshe, protesta e infermierëve, mamive dhe profesionistëve tjerë shëndetësorë të Kosovës do të mbahet të mërkurën duke filluar nga ora 12:00, para Klinikës së Kirurgjisë.