Situata në veri, Policia njofton për sulm fizik, kanosje e disa raste të dëmtimit të veturave

Sot është dita e gjashtë prej kur serbët e Kosovës po protestojnë para objekteve komunale të Zveçanit, Leposaviqit dhe Zubin Potokut. Ata po kundërshtojnë kryetarët e rinj të zgjedhur në këto komuna, duke mos lejuar që ata të hyjnë në objektet e komunave.

Protestat përshkallëzuan kur protestuesit e dhunshëm sulmuan ushtarë të KFOR-it duke i plagosur disa, Policinë e Kosovës dhe mediat.

Policia e Kosovës në raportin 24 orësh ka njoftuar për një rast të kanosjes së një gruaje në Leposaviq, sulmit fizik ndaj dy personave në veri të Mitrovicës së veriut si dhe disa raste të dëmtimit të veturave në Zveçan e po ashtu në Leposaviq.

Në raportin 24 orësh bëhet e ditur se raste kanë ndodhur më 29 maj si dhe më 1 qershor.

Zveçan 29.05.2023 – 06:30-18:30. Më datë 01.06.2023 ankuesi mashkull kosovar ka raportuar se veturën e tij që e kishte të parkuar, e ka vërejtur se nga të dyshuar deri më tani të panjohur e njëjta i ishte dëmtuar. Në lidhje me rastin është konsultuar prokurori i shtetit, rasti vazhdon të hetohet.

Zveçan 29.05.2023 – 06:20-23:00. Po ashtu më datë 01.06.2023 ankuesi mashkull kosovar ka raportuar se veturën e tij që e kishte të parkuar, e ka vërejtur se nga të dyshuar deri më tani të panjohur e njëjta i ishte dëmtuar. Në lidhje me rastin është konsultuar prokurori i shtetit, rasti vazhdon të hetohet.

Leposaviq 01.06.2023 – 00:00. Ankuesi mashkull kosovar ka raportuar se tre të dyshuar, të cilët dyshohet se kanë qenë me maska ia kanë dëmtuar veturën. Njësitë relevante policore kanë dalë në vendin e ngjarjes. Në lidhje me rastin është konsultuar prokurori i shtetit, rasti vazhdon të hetohet.

Leposaviq 26.05.2023 – 13:06. Viktima femër kosovare ka raportuar se ndjehet e kërcënuar nga persona i/të dyshuar, të maskuar, me gurë në duar duke bërë lëvizje në zonën e banimit. Viktima po ashtu ka potencuar se ka pranuar mesazh kërcënues. Në lidhje me rastin është konsultuar prokurori i shtetit, rasti vazhdon të hetohet.

Mitrovicë Veri 01.06.2023 – 13:00. Nga të dyshuar deri më tani të panjohur janë sulmuar dhe lënduar dy viktimat meshkuj kosovarë. Viktimave iu është ofruar tretman mjekësor e më pas janë liruar për në shtëpi. Në lidhje me rastin është konsultuar prokurori i shtetit, rasti vazhdon të hetohet./21Media