Stoltenberg: Aleatët e NATO-s pajtohen se Ukraina duhet të bëhet anëtare

Sekretari i Përgjithshëm i NATO-s, Jens Stoltenberg riafirmoi të premten se Ukraina duhet t’i bashkohet aleancës ushtarake, duke shtuar se të gjithë aleatët e NATO-s kanë rënë dakord që vendi të jetë anëtar.

“Të gjithë aleatët e NATO-s kanë rënë dakord që Ukraina duhet të bëhet anëtare e NATO-s, por fokusi kryesor tani është sigurisht se si të sigurohet që Ukraina të mbizotërojë”, u tha Stoltenberg gazetarëve në bazën ajrore Ramstein, pa dhënë një datë përfundimtare se kur do të ndodhte kjo.

“Kur të përfundojë lufta, ne duhet të sigurojmë se historia nuk do të përsëritet, se Rusia nuk është në gjendje të vazhdojë të sulmojë dhe të luftojë përsëri kundër Ukrainës dhe të vazhdojë të shkatërrojë sigurinë evropiane”, shtoi ai.

Të enjten, Sekretari i Përgjithshëm ishte në kryeqytetin e Ukrainës, Kiev, ku u takua me presidentin ukrainas Volodymyr Zelensky.

Ai tha se të dy diskutuan mbështetjen e fortë të NATO-s për Ukrainën dhe se Zelensky e kishte pranuar ftesën e tij për të marrë pjesë në samitin e NATO-s në Lituani në korrik./21Media