​Sulmet ruse godasin Kievin, plagosin dy civilë dhe dëmtojnë shtëpi

Një sulm me dron dhe raketa ruse në kryeqytetin ukrainas, Kiev, ka vrarë të paktën një person dhe ka plagosur shtatë të tjerë, thonë zyrtarët e qytetit.

Mëngjesin e së shtunës, ndërtesat e banimit në disa lagje u goditën dhe shpërthime të fuqishme, të cilat u dëgjuan në të gjithë qytetin, raporton BBC.

Kryebashkiaku i Kievit, Vitaly Klitschko, tha se një fëmijë 13-vjeçar ishte midis të plagosurve dhe katër persona ishin dërguar në spital.

Këtë javë, një sulm i ngjashëm ndaj Kievit vrau shtatë persona, thanë zyrtarët ukrainas. Bombardimi i fundit ndodhi ndërsa negociatorët ukrainas po përgatiteshin për bisedime me zyrtarët amerikanë këtë fundjavë mbi një plan të ndryshuar të paqes të SHBA-së.

Kreu i administratës ushtarake të Kievit, Timur Tkachenko, konfirmoi se sulmi i së shtunës goditi “objektiva të shumtë në periferi të kryeqytetit”.

“Dronët armiqësorë janë mbi qytet, me mbrojtjen ajrore në përgjigje”, ka shkruar ai në Telegram.

“Aktualisht, në Kiev ka gjithsej një të vdekur dhe shtatë të plagosur, përfshirë një fëmijë.”

Trupi i një burri u gjet nga ekipet e shpëtimit në lagjen Sviatoshynskyi në perëndim të qytetit, konfirmoi Tkachenko.

Sulmi i së shtunës vjen në mes të presionit të Presidentit Donald Trump që të dyja palët të pranojnë një draft plan paqeje, i cili fillimisht anonte shumë nga kërkesat e Moskës. Më pas u rishikua gjatë bisedimeve midis negociatorëve ukrainas dhe amerikanë në Gjenevë.