Sveçla: Kemi qenë në nivelin e gatishmërisë që nga fillimi i përkeqësimit të situatës në Pejë

Ministri i Punëve të Brendshme, Xhelal Sveçla ka thënë se të gjithë jemi jashtëzakonisht të shqetësuar me vërshimet e mëdha në Pejë, derisa ka shprehur pikëllimin që këto vërshime morën jetën e dy qytetarëve.

“Që nga fillimi i përkeqësimit të situatës, të gjithë akterët e nivelit qendror kanë qenë në nivelin më të lartë të gatishmërisë për reagim dhe vazhdojnë të jenë në koordinim të ngushtë me nivelin lokal ku po bëhet vlerësim sistematik i situatës”, ka shkruar Sveçla.

Sveçla ka shprehur ngushëllime familjeve Ademaj dhe Hoxhiq për humbjen e më të dashurve të tyre.

“Falënderoj qytetarët për bashkëpunimin dhe komunikimin e vazhdueshëm mbrëmë me Qendrat Operative Emergjente dhe njëkohësisht i ftoj që për çdo kërkesë apo informacion të vijojnë të kontaktojnë pa pagesë në numrin emergjent 112, Policinë e Kosovës 192 dhe Zjarrfikësit 193”, ka shkruar tutje Sveçla.

Një fëmijë 5 vjeç dhe nëna e tij kanë humbur jetën dhe dy të tjerë janë lënduar si pasojë e përmbytjeve që goditën mbrëmjen e së shtunës qytetin e Pejës./21Meda