Të dyshuarve për sulmin terrorist në Banjskë iu vazhdohet paraburgimi

Dushan Maksimoviq, Vladimir Toliq dhe Blagoje Spasojeviq të dyshuar për sulmin terrorist të ndodhur më 24 shtator të këtij viti në Banjskë të Zveçanit, iu është vazhduar masa e paraburgimit edhe për dy muaj të tjerë.

Lajmin për portalin rtv21.tv e ka konfirmuar zëdhënësja e Gjykatës Themelore në Prishtinë, Mirlinda Gashi.

“Gjykata Themelore në Prishtinë – Departamenti Special ka aprovuar kërkesën e Prokurorisë Speciale të Republikës së Kosovës, ashtu që të pandehurve V.T., B.S. dhe D.M., iu është vazhduar masa e paraburgimit në kohëzgjatje prej 2 (dy) muaj, për secilin”, ka thënë Gashi.

Tre të dyshuarit për sulmin terrorist në Banjskë, gjendën në masën e paraburgimit që nga 26 shtatori i këtij viti.

Aksioni në Banjskë të Zveçanit kishte nisur në orët e hershme të së dielës (24 shtator 2023) ku ishte vrarë rreshteri Afrim Bunjaku si dhe ishin plagosur dy policë të tjerë.