Thaçi takoi kryetaren e KQZ-së dhe drejtorin e Policisë

Thaçi në të dy takimet ka folur për zgjedhjet që do të mbahen në vend

Presidenti i Kosovës, Hashim Thaçi, në fillim të fushatës elektorale ka pritur sot në takim kryetaren e KQZ-së, Valdete Daka, dhe drejtorin e Përgjithshëm të Policisë së Kosovës, Shpend Maxhunin, të cilët kanë treguar për përgatitjet që janë bërë për mbarëvajtjen e procesit elektoral.

Presidenti Thaçi është shprehur i kënaqur me punën që kanë bërë këto dy institucionet, KQZ-ja dhe PK-ja, për t’u siguruar që zgjedhjet e 11 qershorit do të jenë të drejta, të lira dhe demokratike.

“Kosova ka ndërtuar traditë të zgjedhjeve të lira, fer, të drejta dhe demokratike dhe jam i bindur se të tilla do të jenë edhe zgjedhjet e ardhshme”, u shpreh presidenti Thaçi.

“Komisioni Qendror i Zgjedhjeve ka përvojën dhe profesionalizmin e duhur për të organizuar zgjedhje të standardeve më të larta. Policia e Kosovës ka përgatitjen e duhur për t’u siguruar se çdo gjë do të jetë e qetë dhe paqësore deri në fund të zgjedhjeve”, është shprehur presidenti Thaçi.

Presidenti Thaçi gjithashtu ftoi përsëri të gjithë qytetarët që të marrin pjesë në zgjedhje, si dhe partitë politike i ftoi që të vazhdojnë me gjuhën konstruktive dhe me garën fer dhe të qetë. “Kosova do të dëshmojë edhe një herë pjekurinë politike duke mbajtur zgjedhje të lira, të drejta dhe demokratike”, përfundoi presidenti Thaçi.