Tri vjet më parë Hashim Thaçi u zgjodh president i Kosovës
Hashim Thaçi detyrën e presidentit e ka marrë më 7 prill 2016
Kryetari i atëhershëm i Partisë Demokratike të Kosovës, Hashim Thaçi ishte zgjedhur president i Kosovës në raundin e tretë të votimeve mes tensionesh të larta politike më 26 shkurt të vitit 2016.
Ai kishte fituar me 71 vota në raundin e tretë pasi në dy raundet e para nuk kishte arritur të sigurojë dy të tretat e votave të deputetëve. Zgjedhja e tij ishte kundërshtuar ashpër nga partitë opozitare, të cilat dy herë radhazi kishin ndërprerë seancën duke hedhur gaz lotsjellës.
Në pjesën e parë të seancës, deputetët e opozitës njëri pas tjetrit kishin diskutuar kundër zgjedhjes së Thaçit në postin e presidentit duke e akuzuar atë dhe kryeministrin Isa Mustafa, për veprime të dëmshme kundër Kosovës. Në debatet e tyre ata kishin vënë theksin te marrëveshjet e arritura në bisedimet me Serbinë si dhe atë për shënimin e kufirit me Malin e Zi.
Deputetët e opozitës kishin shfaqur dyshimin se kandidati për president Hashim Thaçi, mund të ketë bërë lëshime të reja përballë Listës serbe në shkëmbim të votës së tyre në favor të zgjedhjes së tij.
Derisa po zhvilloheshin raundet e votimeve, jashtë parlamentit, policia kishte përdorur gazin lotsjellës dhe “topat e ujit” për të shpërndarë grupe protestuesish që kishin hedhur shishe me benzinë në kundërshtim të procesit të zgjedhjes së presidentit të ri të Kosovës. Të paktën 11 pjesëtarë të policisë dhe një protestues ishin lënduar gjatë përleshjeve.
Hashim Thaçi detyrën e presidentit e ka marrë më 7 prill 2016, pas betimit solemn në Kuvendin e Kosovës. Para se të bëhej president, Thaçi ka qenë një vit zëvendëskryeministër i parë dhe ministër i Punëve të Jashtme (2014-2015), si dhe kryeministër i Republikës së Kosovës në dy mandate (2007-2014). Thaçi ka qenë kryetari i parë i Partisë Demokratike të Kosovës dhe është rizgjedhur vazhdimisht kryetar i partisë, deri më dorëheqjen e tij më 26 shkurt 2016, para se të votohej për president të Kosovës.
Hashim Thaçi ka shpallur Kosovën shtet të pavarur më 17 shkurt 2008, ka udhëhequr ekipin e Kosovës në bisedimet në Rambouillet në shkurt 1999 dhe ka qenë udhëheqës politik i Ushtrisë Çlirimtare të Kosovës gjatë viteve të luftës 1997 – 1999. Thaçi ishte lideri politik më i votuar në zgjedhjet e 8 qershorit 2014.
Si kryeministër i Kosovës, Hashim Thaçi, ka udhëhequr dialogun politik mes Republikës së Kosovës dhe Republikës së Serbisë, që më 19 prill 2013 ka rezultuar me nënshkrimin e marrëveshjes për normalizimin e marrëdhënieve mes Kosovës dhe Serbisë.
Për angazhimin e tij për paqe dhe stabilitet, në vitin 2014, Hashim Thaçi ishte nominuar për Çmimin Nobel për Paqe nga kongresistë dhe senatorë amerikan, si dhe nga përfaqësues të Parlamentit Evropian. Karriera politike e Hashim Thaçit kishte filluar me angazhimin e tij në Lëvizjen Popullore të Kosovës (LPK), lëvizje politike kjo që kishte synuar emancipimin e pozitës së shqiptarëve në ish-Jugosllavi.
Si student në Universitetin e Prishtinës, Thaçi ishte bërë lider i Lëvizjes Studentore në periudhën mes viteve 1990 dhe 1993, vite këto kur pushteti i Beogradit kishte mbyllur institucionet arsimore universitare në gjuhën shqipe, ndërsa Universiteti i Prishtinës kishte filluar të vepronte jashtë sistemit institucional.
Më 1991, Thaçi ishte zgjedhur prorektor-student i Universitetit të Prishtinës, ku ka dhënë kontribut në strukturimin dhe zhvillimin e procesit paralel mësimor universitar.
Hashim Thaçi është njëri ndër themeluesit e organizatës politiko-ushtarake, Ushtrisë Çlirimtare të Kosovës (UÇK).
Nga viti 1997, Hashim Thaçi ishte udhëheqës i Drejtorisë Politike të Ushtrisë Çlirimtare të Kosovës. Në këtë cilësi, ai ka kryesuar delegacionin e Kosovës në Konferencën Ndërkombëtare të mbajtur në Rambouillet të Francës, nga 6 deri më 22 shkurt 1999.
Pas luftës, Hashim Thaçi ishte kryeministër i Qeverisë së Përkohshme të Kosovës nga 1999 – 2000. Thaçi ka qenë anëtar i Këshillit të Përkohshëm Administrativ (KPA), strukturë kjo e përbashkët qeverisëse e Misionit të OKB-së në Kosovë (UNMIK) dhe klasës politike kosovare, deri më 2001 kur ishin mbajtur zgjedhjet e para parlamentare në Kosovën e pasluftës.
Në tetor të vitit 1999, Hashim Thaçi ishte ndër themeluesit e Partisë së Progresit Demokratik të Kosovës (PPDK). Në kuvendin e parë zgjedhor të partisë, në vitin 2000, partia e ka ndryshuar emrin në Partia Demokratike e Kosovës, ndërsa Hashim Thaçi ishte zgjedhur kryetar i saj, post të cilin e ka mbajtur deri më 26 shkurt 2016.
Thaçi ishte anëtar i Ekipit të Unitetit që përfaqësoi Kosovën në procesin negociator të udhëhequr nga Emisari Special i OKB-së, Presidenti Martti Ahtisaari, që ka negociuar statusin politik të Kosovës, 2005 – 2007.
Pas fitores së Partisë Demokratike të Kosovës në zgjedhjet parlamentare të 17 nëntorit 2007, Hashim Thaçi ishte zgjedhur Kryeministër i Qeverisë së Kosovës. Kurse, më 17 shkurt të vitit 2008, kryeministri Hashim Thaçi në Kuvendin e Kosovës ka shpallur Kosovën shtet të pavarur. Hashim Thaçi ishte kryeministri i parë i Qeverisë së Republikës së Kosovës.