Adem Demaçi kujtohet në ditën e lindjes

Demçi ka vdekur më 26 korrik të vitit të kaluar

I njohur si simbol i rezistencës kombëtare, i ndjeri Adem Demaçi sot do të mbushte 83 vjet.

Me prejardhje nga fshati Lupq i Podujevës, Demaçi u lind më 26 shkurt 1936 në Prishtinë, ndërsa vdiq më 26 korrik të vitit të kaluar.

Adem Demaçi, ishte veprimtar për kauzën kombëtare në kohën e Jugosllavisë dhe kishte luftuar për barazinë e Kosovës me Republikat e tjera të Jugosllavisë.

Për angazhimin e tij politik, Adem Demaçi kishte vuajtuar 28 vjet me radhë në burgjet e Jugosllavisë. Pasi ishte liruar ai menjëherë kishte vazhduar aktivitetin e tij politik.

Ai ishte quajtur edhe Nelson Mandela i Evropës.

Adem Demaçi ka udhëhequr Këshillin për të Drejtat dhe Liritë e Njeriut (KMDLNJ) nga 1990 deri 1995.

Në vitin 1991 ishte nderuar nga Parlamenti Evropian me Çmimin Saharov. Gjatë periudhës 1998/1999 kur janë mbajtur takimet në Rambouillet për të ardhmen e Kosovës, ai ishte zëdhënës politik i UÇK-së.

Demaçi ka qenë edhe kryetar i Lidhjes së Shkrimtarëve të Kosovës (2005-2007). Sot, njerëzit e rezistencës kombëtare identifikohen me emrin e Adem Demaçit, sepse ai me punën e tij dhe me veprën e tij, është bërë simbol i unifikimit për ruajtjen e kombin shqiptarë, mbi pesë dekada.

Adem Demaçi me jetën dhe veprën e tij, është shndërruar në një personalitet të përmasave të historisë së përgjithshme njerëzore, ku bënë pjesë edhe historia jonë kombëtare. Ai ka shkruar romanin “Gjarpijt e Gjakut”, i cili ishte ndaluar nga regjimi ish-komunist. Ai e kishte parë dritën vetëm pas viteve nëntëdhjeta.

Simboli i rezistencës kombëtare, Adem Demaçi ka vdekur pasditen e 26 korrikut të vitit 2018. Në nderim të tij janë organizuar shumë aktivitete shtetërore si dhe janë mbajtur tri ditë zie në Kosovë.